Read Kernewek Eksodus 24 Bible Online

Eksodus 24 - Kernewek bible

Eksodus 24

¹Hag ev a leveris dhe Moyses, ‘Yskynn dhe'n ARLOEDH, ty hag Aron, Nadab, hag Abihu, ha deg ha tri-ugens dhiworth henavogyon Ysrael, ha gordhya a-bell.

²Moyses y honan a dheu nes dhe'n ARLOEDH, mes ny wra an re erell dos yn ogas, ha ny wra an bobel yskynna ganso.’

³Moyses a dheuth ha leverel dhe'n bobel geryow oll an ARLOEDH hag oll an ordenansow; ha'n bobel oll a worthybis gans unn lev, ha leverel, ‘Oll an geryow re gewsis an ARLOEDH, ni a's gwra.’

⁴Ha Moyses a skrifas geryow oll a'n ARLOEDH. Hag ev a sevis myttin a-varr, ha drehevel alter dhe droes an menydh, ha drehevel dewdhek peulven, herwydh dewdhek loeth Ysrael.

⁵Hag ev a dhannvonas gwer yowynk a vebyon Ysrael, neb a offrynnas offrynnow leskys ha sakrifia offrynnow kres a lodhnow dhe'n ARLOEDH.

⁶Ha Moyses a gemmeras hanter an goes ha'y worra yn basonyow, ha hanter an goes ev a'n skoellyas war an alter.

⁷Ena ev a gemmeras lyver an kevambos, ha'y lenna yn dewlagas an bobel; hag i a leveris, ‘Oll re gewsis an ARLOEDH, ni a'n gwra, ha ni a vydh gostydh.’

⁸Ha Moyses a gemmeras an goes ha'y skoellya war an bobel, ow leverel, ‘Otta goes an kevambos gwrys genowgh gans an ARLOEDH herwydh oll an geryow ma.’

⁹Ena Moyses hag Aron, Nadab, hag Abihu, ha'n deg ha tri-ugens dhiworth henavogyon Ysrael a yskynnas,

¹⁰ha gweles Duw Ysrael, hag yth esa yn-dann y dreys kepar ha leur a saffir avel nev y honan yn klerder.

¹¹Ha ny worras y dhorn war vryntinyon mebyon Ysrael; i a viras war Dhuw, ha dybri hag eva.

¹²An ARLOEDH a leveris dhe Moyses, ‘Yskynn dhymm war an menydh, ha gortos ena, ha my a re dhis an leghennow a ven, gans an lagha ha'n gorhemmynn, re skrifis dh'aga dyskans.’

¹³Ytho Moyses a sevis gans y venyster Yoshua, ha Moyses a yskynnas dhe venydh Duw.

¹⁴Hag ev a leveris dhe'n henavogyon, ‘Gortewgh omma ragon, bys pan dheun dhywgh arta; hag otta, yma Aron ha Hur genowgh; piwpynag a'n jeves ken, gwres mones dhedha.’

¹⁵Ena Moyses a yskynnas war an menydh, ha'n gommolenn a gudhas an menydh.

¹⁶Splannder Duw a goedhas war venydh Sinay, ha'n kommol a'n kudhas hwegh dydh; hag y'n seythves dydh ev a elwis Moyses yn-mes a gres an kommol.

¹⁷Ytho omdhiskwedhyans splannder Duw o avel tan ow tewi war benn an menydh a-wel mebyon Ysrael.

¹⁸Ha Moyses a entras a-ji dhe'n kommol hag yskynna war an menydh. Hag yth esa Moyses war an menydh dew-ugens dydh ha dew-ugens nos.