Read Kernewek Eksodus 26 Bible Online

Eksodus 26 - Kernewek bible

Eksodus 26

¹Ha, ty a wra an tabernakel gans deg kroglenn a sendal plethys ha pann glas ha purpur ha kogh; gans cherubim, ober gweythor kweth, ty a's gwra.

²Hys pub kroglenn a vydh eth kevelin warn ugens, ha les pub kroglenn peswar kevelin; oll an kroglennow a's tevydh an unn myns.

³Pymp kroglenn a vydh junys an eyl dh'y ben; ha'n pymp kroglenn arall a vydh junys an eyl dh'y ben.

⁴Ha ty a wra stagellow a bann glas war amal an groglenn bella a'n kynsa bagas; hag yndella ynwedh ty a wra stagellow war amal an groglenn bella a'n nessa bagas.

⁵Hanter-kans stagell ty a wra war an kynsa kroglenn, ha hanter-kans stagell ty a wra war amal an groglenn usi y'n nessa bagas; an stagellow a vydh an eyl a-dal hy ben.

⁶Ha ty a wra hanter-kans bagh a owr, ha junya an kroglennow an eyl dh'y ben gans an baghow, may fydh an tabernakel unnses tien.

⁷Ynwedh ty a wra kroglennow a vlew gever rag tylda a-ugh an tabernakel; unnek kroglenn a wredh.

⁸Hys pub kroglenn a vydh deg kevelin warn ugens, ha les pub kroglenn peswar kevelin; an unnek kroglenn a's tevydh an keth myns.

⁹Ha ty a wra junya pymp kroglenn a'ga honan, ha hwegh kroglenn a'ga honan, ha'n hweghves kroglenn ty a wra plegya a-rag an tylda.

¹⁰Ha ty a wra hanter-kans stagell war amal an groglenn yw an pella yn unn bagas, ha hanter-kans stagell war amal an groglenn yw an pella y'n nessa bagas.

¹¹Ha ty a wra hanter-kans bagh a vrons, ha gorra an baghow y'n stagellow, ha junya an tylda war-barth may fydh unnses dien.

¹²Ha'n rann yw gesys a'n kroglennow a'n tylda, an hanter kroglenn yw gesys, a wra kregi war an tu a-dryv an tabernakel.

¹³Ha'n kevelin war an eyl tu, ha'n kevelin war an tu arall, a'n pyth yw gesys yn hirder kroglennow an tylda a wra kregi war denwennow an tabernakel, war an tenewen ma ha'n tenewen na, dh'y gudha.

¹⁴Ha ty a wra kudhans dhe'n tylda, a greghyn rudhhes a hordhes, ha kudhans a greghyn morhoghes a-ughto.

¹⁵Ha ty a wra framyow dhe'n tabernakel a brenn shittim, a'ga sav.

¹⁶Deg kevelin a vydh hys an fram, ha kevelin ha hanter an les a bub fram.

¹⁷Y fydh dew denon yn pub fram, rag desedha war-barth; yndella ty a wra rag oll an framyow a'n tabernakel.

¹⁸Ty a wra an framyow rag an tabernakel: ugens fram dhe'n barth dhyghow;

¹⁹ha dew-ugens sel arghans ty a wra yn-dann an ugens fram, diw sel yn-dann unn fram rag y dhew denon, ha diw sel yn-dann fram arall rag y dhew denon;

²⁰ha dhe'n nessa tu a'n tabernakel, dhe'n barth kledh ugens fram,

²¹ha'ga dew-ugens sel a arghans, diw sel yn-dann unn fram, ha diw sel yn-dann bub fram arall;

²²ha rag rann a-dryv an tabernakel dhe'n howlsedhes ty a wra hwegh fram.

²³Ha ty a wra dew fram rag kornellow an tabernakel a-dryv;

²⁴i a vydh dewblek dhe-woeles, mes junys war-barth dhe'n penn, dhe'n kynsa lagasenn; yndella y fydh aga dew; i a wra formya an dhiw gornell.

²⁵Hag y fydh eth fram, ha'ga krawyow a arghans, hwetek kraw; dew graw yn-dann unn fram, ha dew graw yn-dann bub fram arall.

²⁶Ha ty a wra barrys yn prenn shittim, pymp rag an framyow war unn tenewen a'n tabernakel,

²⁷ha pymp barr rag framyow tenewen arall an tabernakel, ha pymp barr rag framyow an tabernakel a-dryv, war-tu ha'n howlsedhes.

²⁸An barr kres, yn kres an framyow, a wra tremena dredha a benn dhe benn.

²⁹Ty a wra gorowra an framyow, ha gul lagasennow owr rag synsi an barrys, ha ty a wra gorowra an barrys gans owr.

³⁰Ha ty a wra drehevel an tabernakel herwydh an ragdho re beu diskwedhys dhis war an menydh.

³¹Ha ty a wra vayl a bann glas ha purpur ha kogh ha sendal plethys; y fydh gwrys gans cherubim, ober gweythor kweth;

³²ha ty a wra hy kregi war beder koloven a shittim gorowrys gans owr, gans higennow owr, war beder sel arghans.

³³Ha ty a wra kregi an vayl a'n baghow, ha dri argh an dustuni di a-ji dhe'n vayl; ha'n vayl a wra ranna ragos an tyller sans dhiworth an moyha sans.

³⁴Ha ty a wra gorra an dregeredhva war argh an dustuni y'n tyller an moyha sans.

³⁵Ha ty a wra settya an voes a-ves a'n vayl, ha'n kantoler dhe barth dhyghow an tabernakel a-dal an voes; ha ty a wra gorra an voes dhe'n barth kledh.

³⁶Ha ty a wra kroglenn rag porth an tabernakel, a bann glas ha purpur ha kogh ha sendal plethys, brosys gans gweyth naswydh.

³⁷Ha ty a wra rag an groglenn pymp koloven a shittim, ha'ga gorowra; aga higennow a vydh a owr, ha ty a wra pymp sel ragdha a vrons teudhys.