Read Kernewek Eksodus 27 Bible Online

Eksodus 27 - Kernewek bible

Eksodus 27

¹Ty a wra an alter a brenn shittim, pymp kevelin hy hys ha pymp kevelin hy les; an alter a vydh pedrek, ha'y ughelder a vydh tri hevelin.

²Ha ty a wra kern rygdhi war hy feder kornell; ha'n kern a vydh a unn rann gensi, ha ty a wra hy gorlownya gans brons.

³Ty a wra pottow rygdhi dhe dhegemmeres hy lusu, ha'y reuvow ha'y bollow ha'y gigveryow ha'y fadellow-tan; oll hy daffar ty a wra a vrons.

⁴Ty a wra rygdhi ynwedh rastell, roesweyth a vrons; ha war an roes ty a wra peder lagasenn vrons dh'y beder kornell.

⁵Ha ty a wra hy settya yn-dann estyllenn an alter mayth ystynno an roes bys yn hanter ughelder an alter.

⁶Ha ty a wra gwelynni dhe'n alter, gwelynni a brenn shittim, ha'ga gorlownya gans brons,

⁷ha'n gwelynni a vydh gorrys der an lagasennow, may fydh an gwelynni dhe'n dhew denewen a'n alter pan vo degys.

⁸Ty a's gwra kow, gans plenkys; dell veu diskwedhys dhis war an menydh, yndella y fydh gwrys.

⁹Ty a wra klos an tabernakel. Dhe'n barth dhyghow, an klos a'n tevydh kroglennow a sendal plethys kans kevelin aga hys dhe'n eyl tenewen;

¹⁰aga holovenyow a vydh ugens ha'ga selveyn ugens, a vrons, mes higennow an kolovenyow ha'ga bondow a vydh a arghans.

¹¹Hag yndellma dh'y hys dhe'n tenewen kledh y fydh kroglennow kans kevelin aga hys, aga holovenyow ugens ha'ga selveyn ugens, a vrons, mes higennow an kolovenyow ha'ga bondow a vydh a arghans.

¹²Ha dhe les an klos dhe denewen an howlsedhes y fydh kroglennow a hanter-kans kevelin, gans deg koloven ha deg selven.

¹³Les an klos war denewen an est, troha'n howldrehevel, a vydh hanter-kans kevelin.

¹⁴Kroglennow an eyl tenewen a'n yet a vydh pymthek kevelin, gans teyr holoven ha tri selven.

¹⁵Dhe'n tenewen arall, an kroglennow a vydh pymthek kevelin, gans teyr holoven ha tri selven.

¹⁶Dhe borth an klos y fydh kroglenn, ugens kevelin hy hys, a bann glas ha purpur ha kogh ha sendal plethys, brosys gans brosweyth; peder koloven y's tevydh ha gansa peswar selven.

¹⁷Oll an kolovenyow a-dro dhe'n klos a'n jevydh bondow a arghans; aga higennow a vydh a arghans, ha'ga selveyn a vrons.

¹⁸Hys an klos a vydh kans kevelin, an les hanter-kans, ha'n ughelder pymp kevelin, gansa kroglennow a sendal plethys ha selveyn a vrons.

¹⁹Oll an toulow a'n tabernakel rag pub devnydh, hag oll y ebilyer hag oll ebilyer an klos a vydh a vrons.

²⁰Ha ty a wra gorhemmynna dhe vebyon Ysrael may tokkons dhis oyl oliv gweskys pur rag an golow may fo settys lugarn a lesk heb hedhi.

²¹Yn tylda an kuntelles, a-ves dhe'n vayl usi a-rag an dustuni, Aron ha'y vebyon a wra y witha a'n gorthugher dhe'n myttin a-rag an ARLOEDH. Y fydh ordenans bys vykken dhe vebyon Ysrael der aga henedhow.