Read Kernewek Eksodus 28 Bible Online

Eksodus 28 - Kernewek bible

Eksodus 28

¹Ena doro y'th ogas Aron dha vroder, ha'y vebyon ganso, yn-mes a vebyon Ysrael, dhe'm servya avel oferysi — Aron ha mebyon Aron, Nadab hag Abihu, Eleazar hag Ithamar.

²Ha ty a wra gwiskasow sans a-barth Aron dha vroder, rag gordhyans ha rag tekter.

³Ha ty a gews orth oll an re yw abel, neb a lenwis vy gans skentoleth, may hwrons gwiskasow Aron dh'y sakra dhe'm servya avel oferyas.

⁴An re ma yw an gwiskasow a wrons: lurik, efod, pows, mantell a vrithweyth, tulyfant ha grogys; i a wra gwiskasow sans rag Aron dha vroder ha'y vebyon dhe'm servya avel oferysi.

⁵I a dhegemmer pann owrek, glas ha purpur ha kogh, ha sendal.

⁶Hag i a wra an efod gans pann owrek, glas ha purpur ha kogh, ha sendal plethys, ober gweythor kweth.

⁷Dew skoedhlien a'n jevydh kelmys orth y dhew amal may fo junys war-barth.

⁸Ha'n kyngel war an efod a vydh a'n keth kreftweyth ha daffar avello, a bann owr, glas ha purpur ha kogh, ha sendal plethys.

⁹Ha ty a gemmer dew ven onyks ha gravya warnedha henwyn mebyon Ysrael,

¹⁰hwegh a'ga henwyn war an eyl men ha henwyn an hwegh arall war y gila, war-lergh aga genesigeth.

¹¹Par dell wra joweler gravya men, avel gravyans sel, yndella ty a wra gravya an dhew ven gans henwyn mebyon Ysrael; ty a wra aga gorra yn settyansow a blethweyth owr.

¹²Ha ty a worr an dhew ven war skoedhlienyow an efod, avel meyn kov rag mebyon Ysrael; hag Aron a wra doen aga henwyn war y dhiwskoedh a-rag an ARLOEDH yn kovadh.

¹³Ha ty a wra settyansow a blethweyth owr,

¹⁴ha diw gadon a owr pur, gwiys avel kerdyn; ha ty a wra staga an kadonyow kordennys dhe'n settyansow.

¹⁵Ha ty a wra lurik a vreus, sleyghweythys; kepar hag ober an efod ty a'n gwra; a bann owrek, glas ha purpur ha kogh hag a sendal plethys ty a'n gwra.

¹⁶Pedrek vydh ha dewblek, dornva y hys ha dornva y les.

¹⁷Ha ty a wra desedha ynno peswar rew a veyn. Rew a sardius, topaz ha gwyrven a vydh an kynsa rew;

¹⁸ha'n nessa rew garnet, saffir hag adamant;

¹⁹ha'n tressa rew yasinth, agat hag amethyst;

²⁰ha'n peswora owrven, onyks ha yasper; plethweyth owr i a vydh yn aga lagasow.

²¹Y fydh dewdhek men ha'ga henwyn herwydh henwyn mebyon Ysrael; i a vydh avel gravyans sel, peub war-lergh y hanow, rag an dewdhek loeth.

²²Ha ty a wra dhe'n lurik kadonyow gwiys avel kerdyn a owr pur;

²³ha ty a wra dhe'n lurik dew gylgh a owr, ha gorra an dhew gylgh war dhew amal an lurik.

²⁴Ha ty a wra gorra an dhiw gordenn a owr y'n dhew gylgh war emlow an lurik;

²⁵an dhew benn a'n dhiw gordenn ty a wra staga orth an dhew dhesedhyans a blethweyth; hag yndellma y staga a-rag dhe skoedhlienyow an efod.

²⁶Ha ty a wra dew gylgh a owr, ha'ga gorra dhe dhew benn an lurik, war y amal a-bervedh ryb an efod.

²⁷Ha ty a wra dew gylgh a owr, ha'ga staga a-rag dhe rann isella dew skoedhlien an efod, dh'y junyans a-ugh kyngel an efod.

²⁸Hag i a wra kelmi an lurik der y lagasennow dhe lagasennow an efod gans snod glasrudh, may hworwettho war gyngel sleyghweythys an efod.

²⁹Yndellma Aron a wra doen henwyn mebyon Ysrael y'n lurik a vreus war y golonn pan a dhe'n tyller sans dhe dhri kov heb hedhi a-dherag an ARLOEDH.

³⁰Hag y'n lurik a vreus ty a wra gorra an Urim ha'n Thummim, hag i a vydh war golonn Aron, pan a a-ji a-rag an ARLOEDH; yndellma Aron a wra doen breus mebyon Ysrael war y golonn a-rag an ARLOEDH heb hedhi.

³¹Ha ty a wra mantell an efod oll a bann glas.

³²Ynni hi a's tevydh igeryans rag an penn, ha bond gwiys a vydh dhe'n igeryans a-derdro, avel an igeryans yn hoberjon, ma na vo fregys.

³³War hy lostennow ty a wra greunavalow a bann glas ha purpur ha kogh, a-dro dh'y lostennow, ha klegh a owr yntredha a-derdro,

³⁴klogh owrek ha greunaval a-dro dhe lostennow an bows.

³⁵Hag y fydh war Aron pan wra ev menystra, ha'y son a vydh klewys pan a dhe'n tyller sans a-dherag an ARLOEDH, ha pan dheu yn-mes, ma na varwo.

³⁶Ha ty a wra medalenn a owr pur, ha gravya warnedhi, avel gravyans sel, ‘Sans dhe'n ARLOEDH.’

³⁷Ha ty a wra y fastya war an tulyfant dre snod glas; y fydh war fas an tulyfant.

³⁸War dal Aron y fydh, hag Aron a wra omgemmeres kabel pynag a dheffo a'n offrynn sans sakrys gans mebyon Ysrael avel aga rohow sans; y fydh pup-prys war y dal may fons degemmerys a-rag an ARLOEDH.

³⁹Ha ty a wra gwia an bows yn brithweyth a sendal, ha ty a wra tulyfant a sendal, ha ty a wra grogys brosys gans brosweyth.

⁴⁰Ha rag mebyon Aron ty a wra powsyow ha grogysyow ha kappow; ty a's gwra rag gordhyans ha tekter.

⁴¹Ha ty a wra aga gorra war Aron dha vroder, ha war y vebyon ganso, ha'ga untya ha'ga ordena ha'ga sakra, ma'm serfyons avel oferysi.

⁴²Ha ty a wra dhedha lavrek a lien dhe gudha aga noethedh; a'n glun dhe'n vordhos y hwra ystynn;

⁴³Hag i a vydh war Aron ha war y vebyon pan ons a-ji dhe dylda an kuntelles, po pan dhons ogas dhe'n alter dhe venystra y'n tyller sans; ma na dhokkons kabel warnedha aga honan ha merwel. Hemma a vydh ordenans bys vykken ragdho ev ha'y dhiyskynnysi war y lergh.