Read Kernewek Eksodus 29 Bible Online

Eksodus 29 - Kernewek bible

Eksodus 29

¹Lemmyn, hemm yw an pyth a wredh dh'aga sakra, ma'm serfyons avel oferysi. Kemmer tarow yowynk ha dew hordh dinamm

²ha bara heb goell, ha torthow heb goell myskys gans oyl, ha tesennow tanow urys gans oyl. Ty a's gwra gans bleus gwaneth fin.

³Ha ty a wra aga gorra yn unn ganstell ha'ga dri y'n ganstell, ha dri an lodhen ha'n dhew hordh.

⁴Ty a dhre Aron ha'y vebyon dhe dharas tylda an kuntelles ha'ga golghi gans dowr.

⁵Ha ty a gemmer an gwiskasow, ha gorra war Aron an bows ha mantell an efod, ha'n efod, ha'n lurik, ha'y wrogysa gans kyngel an efod,

⁶ha ty a sett an tulyfant war y benn, ha gorra an gurun sans war an tulyfant.

⁷Ha ty a gemmer oyl an untyans ha'y dhiveri war y benn ha'y untya.

⁸Ena ty a dhre y vebyon, ha gorra powsyow warnedha,

⁹ha'ga grogysa gans grogysyow ha kelmi kappow warnedha; ha'n oferyaseth a vydh dhedha der ordenans heb worfenn. Yndellma ty a wra sakra Aron ha'y vebyon.

¹⁰Ena ty a dhre an lodhen a-rag tylda an kuntelles. Aron ha'y vebyon a wra gorra aga diwleuv war benn an lodhen,

¹¹ha ty a ladh an lodhen a-dherag an ARLOEDH, orth daras tylda an kuntelles,

¹²ha kemmeres rann a woes an lodhen ha'y worra war gern an alter gans dha vys, ha rann arall an goes ty a wra diveri war woeles an alter.

¹³Ha ty a gemmer oll an blonek a worher an pottys, ha stagell an avi, ha'n dhiw loneth ha'n blonek eus warnedha, ha'ga leski war an alter.

¹⁴Mes kig an lodhen, ha'y groghen, ha'y deyl, ty a gowllesk a-ves a'n kamp; offrynn pegh yw.

¹⁵Ena ty a gemmer onan a'n hordhes, hag Aron ha'y vebyon a wra gorra aga diwleuv war benn an hordh,

¹⁶ha ty a ladh an hordh ha kemmeres y woes ha'y skoellya war an alter a-derdro.

¹⁷Ena ty a dregh an hordh yn rannow, ha golghi y golodhyon ha'y arrow, ha'ga gorra gans y rannow ha'y benn,

¹⁸ha leski an hordh dien war an alter; yth yw offrynn leskys dhe'n ARLOEDH; yth yw sawer plegadow, offrynn dre dan dhe'n ARLOEDH.

¹⁹Ty a gemmer an hordh arall; hag Aron ha'y vebyon a wra gorra aga diwleuv war benn an hordh,

²⁰ha ty a ladh an hordh, ha kemmeres rann a'y woes ha'y worra war vin skovarn dhyghow Aron ha war vin skovornow dyghow y vebyon, ha war veus aga dorn dhyghow, ha war vys bras aga throes dyghow, ha skoellya goes war an alter a-derdro.

²¹Ena ty a gemmer neppyth a'n goes usi war an alter, hag a oyl an untyans, ha'ga skoellya war Aron ha war y wiskasow, ha war y vebyon ha war wiskasow y vebyon ganso; hag ev ha'y wiskasow a vydh sans, ha'y vebyon ha gwiskasow y vebyon ganso.

²²Ty a gemmer ynwedh blonek an hordh, ha'n lost blonegek, ha'n blonek a worher an pottys, ha stagell an avi, ha'n dhiw loneth ha'n blonek usi warnedha, ha'n vordhos dhyghow (rag yth yw hordh an urdhyans),

²³hag unn torth-vara, hag unn desenn a vara gans oyl, hag unn desenn danow, yn-mes a'n ganstell a vara heb goell hag usi a-rag an ARLOEDH;

²⁴ha ty a worr oll an re ma yn diwla Aron hag yn diwla y vebyon, ha'ga gwevya avel offrynn gwevys a-rag an ARLOEDH.

²⁵Ena ty a wra aga hemmeres dhiworth aga leuv, ha'ga leski war an alter war an offrynn leskys, avel sawer plegadow a-rag an ARLOEDH; yth yw offrynn dre dan dhe'n ARLOEDH.

²⁶Ha ty a gemmer bronn an hordh a urdhyans Aron ha'y gwevya avel offrynn gwevys a-rag an ARLOEDH; hag y fydh dha rann.

²⁷Ha ty a wra sakra bronn an offrynn gwevys, ha mordhos an offrynn drehevys hag a veu gwevys, hag a veu drehevys dhiworth hordh an urdhyans, dhiworth an rann esa dhe Aron, ha dhiworth an rann esa dh'y vebyon.

²⁸Y fydh rag Aron ha'y vebyon avel ordenans bys vykken dhiworth mebyon Ysrael, rag yth yw offrynn, hag y fydh offrynn gans mebyon Ysrael dhiworth sakrifisow aga offrynnow kres, offrynn dhe'n ARLOEDH.

²⁹Gwiskasow sans Aron a vydh rag y vebyon war y lergh, dhe vos untys ynna ha sakrys ynna.

³⁰An mab neb yw oferyas yn y le a wra aga gwiska seyth dydh, pan dheu a-ji dhe dylda an kuntelles dhe venystra y'n tyller sans.

³¹Ty a gemmer hordh an urdhyans, ha bryjyon y gig y'n tyller sans;

³²hag Aron ha'y vebyon a dheber kig an hordh ha'n bara usi y'n ganstell, dhe dharas tylda an kuntelles.

³³I a dheber an taklow na gansa may feu gwrys prenedh, dh'aga sakra ha sanshe, mes ny wra estren dybri anedha, rag aga bos sans.

³⁴Ha mars eus gesys kig pynag a'n urdhyans po a'n bara, bys y'n myttin, ena ty a wra leski an remenant dre dan; ny vydh dybrys, rag y vos sans.

³⁵Yndellma ty a wra dhe Aron ha dh'y vebyon, herwydh pup-tra re worhemmynnis dhis; dre seyth dydh y hwredh aga sakra,

³⁶ha pub dydh ty a offrynn lodhen avel offrynn pegh rag prenedh. Ynwedh ty a burha an alter, pan wredh prenedh rygdhi, ha'y untya, dh'y sakra.

³⁷Seyth dydh ty a wra prenedh rag an alter, ha'y sakra, ha'n alter a vydh an moyha sans; pynag a docchyo an alter a dheu ha bos sans.

³⁸Lemmyn hemm yw an pyth a offrynnydh war an alter: dew oen unn bloedh, dydh ha dydh heb hedhi.

³⁹Unn oen ty a offrynn myttinweyth, ha'y gila ty a wra offrynna gorthugherweyth;

⁴⁰ha gans an kynsa oen degves rann a efa a vleus fin myskys gans kwarter hin a oyl gweskys, ha kwarter hin gwin rag offrynn diwes.

⁴¹Ha'n eyl oen ty a offrynn y'n gorthugher, hag offrynna ganso offrynn greun hag offrynn sans, avel myttinweyth, avel sawer plegadow, offrynn dre dan dhe'n ARLOEDH.

⁴²Offrynn leskys y fydh heb hedhi der agas henedhow dhe dharas tylda an kuntelles a-rag an ARLOEDH, le may fetyav genes, dhe gewsel ena genes.

⁴³Ena my a vet gans mebyon Ysrael a vydhons sanshes gans ow golewder.

⁴⁴My a saker tylda an kuntelles ha'n alter; Aron ynwedh ha'y vebyon my a wra sakra, dhe'm servya avel oferysi.

⁴⁵Ha my a drig yn mysk mebyon Ysrael, ha my a vydh aga Duw.

⁴⁶Hag i a wodhvydh my dhe vos an ARLOEDH aga Duw, a's dros yn-mes a bow Ejyp may trikken yn aga mysk; my yw an ARLOEDH aga Duw.