Read Kernewek Eksodus 3 Bible Online

Eksodus 3 - Kernewek bible

Eksodus 3

¹Lemmyn yth esa Moyses ow pugelya gre y hwegron, Yethro, oferyas Midyan, hag ev a hembronkas y flokk dhe du an howlsedhes dhe'n gwylvos, ha dos dhe venydh Duw, dhe Horeb.

²Hag el an ARLOEDH a omdhiskwedhas dhodho yn flamm a dan yn-mes a gres an bos; hag ev a viras, hag otta, yth esa an bos gans tan, mes ny veu konsumys.

³Ha Moyses a leveris, ‘My a dreyl a-denewen ha mires orth an welesigeth vras ma ha'n praga ma nag yw leskys an bos.’

⁴Ha'n ARLOEDH a welas ev dhe dreylya dhe vires, ha Duw a'n gelwis yn-mes a'n bos, ‘Moyses, Moyses!’ Hag y leveris, ‘Ottavy.’

⁵Ena y leveris, ‘Na dheus nes; diarghen dha eskisyow a'th treys, rag an tyller may sevydh yw dor sans.’

⁶Hag y leveris, ‘My yw Duw dha das, Duw Abraham, Duw Ysak ha Duw Yakob.’ Ha Moyses a gudhas y fas, rag own a'n jeva a vires orth Duw.

⁷Ena an ARLOEDH a leveris, ‘My re welas galar ow fobel usi yn Ejyp ha klewes aga kri drefenn aga mestrysi kethneth; aswonn a wrav aga galarow;

⁸ha my re dhiyskynnas dh'aga livra yn-mes a leuv an Ejyptianys ha dh'aga dri a'n tir na dhe dir mas ha ledan, dhe dir a dhinwa leth ha mel, dhe dyller an Kananysi, an Hittysi, an Amorysi, an Perizzysi, an Hivysi ha'n Yebusysi.

⁹Ha lemmyn, otta, kri mebyon Ysrael re dheuth dhymm, ha my re welas an arwask mayth arwask an Ejyptianys warnedha.

¹⁰Deus, my a'th tannvon dhe Faro may trylli ow fobel, mebyon Ysrael, yn-mes a Ejyp.’

¹¹Mes Moyses a leveris dhe Dhuw, ‘Piw ov vy mayth ylliv dhe Faro ha dri mebyon Ysrael yn-mes a Ejyp?’

¹²Ev a leveris, ‘Yn sur, my a vydh genes; ha hemma a vydh sin dhis my dhe'th tannvon: pan dhresys an bobel yn-mes a Ejyp, ty a wra servya Duw war an menydh ma.’

¹³Ena Moyses a leveris dhe Dhuw, ‘Mar tov dhe vebyon Ysrael ha leverel dhedha “Duw agas tasow re'm dannvonas dhywgh”, hag i a wovynn orthiv, “Pyth yw y hanow?” pandr'a lavarav dhedha?’

¹⁴Duw a leveris dhe Moyses, ‘MY YW NEB YTH OV VY.’[2] Hag y leveris, ‘Lavar hemma dhe vebyon Ysrael, “MY YW re'm dannvonas dhywgh.” ’

¹⁵Duw a leveris ynwedh dhe Moyses, ‘Lavar hemma dhe vebyon Ysrael, “An ARLOEDH, Duw agas tasow, Duw Abraham, Duw Ysak, ha Duw Yakob, re'm dannvonas dhywgh”: hemm yw ow hanow bys vykken, hag yndellma my a vydh kovhes dres henedhow oll.

¹⁶Ke dhe guntell war-barth henavogyon Ysrael ha leverel dhedha, “An ARLOEDH, Duw agas tasow, Duw Abraham, Ysak ha Yakob re omdhiskwedhas dhymm, ow leverel: My re viras warnowgh ha'n pyth a veu gwrys dhywgh yn Ejyp;

¹⁷hag ambosa a wrav agas dri yn-bann yn-mes a galar Ejyp dhe bow an Kananysi, an Hittysi, an Amorysi, an Perizzysi, an Hivysi ha'n Yebusysi, tir a dhinwa leth ha mel.”

¹⁸Hag i a wra goslowes orth dha lev ha ty ha henavogyon Ysrael a wra mos dhe vyghtern Ejyp ha leverel dhodho, “An ARLOEDH, Duw an Ebrowyon, re vetyas genen; ha lemmyn, ni a'th pys, gas ni dhe vones yn vyaj a dri dydh y'n gwylvos mayth offrynnyn dhe'n ARLOEDH agan Duw.”

¹⁹My a woer na wra myghtern Ejyp agas gasa dhe vones marnas dre leuv grev.

²⁰Ytho my a ystynn ow dorn ha gweskel Ejyp gans ow marthusyon oll a wrav ynno; wosa henna ev a as dhedha mones.

²¹Ha my a re gras dhe'n bobel ma yn golok an Ejyptianys; ha pan yllowgh, nyns ewgh gwag agas leuv,

²²mes pub benyn a wra govynn a'y hentrevoges, hag anedhi hi a wodrik yn hy chi, tegennweyth a arghans hag owr, ha dillas, ha hwi a'gas gorr war agas mebyon ha war agas myrghes; yndellma hwi a byll an Ejyptianys.’