Read Kernewek Eksodus 30 Bible Online

Eksodus 30 - Kernewek bible

Eksodus 30

¹Ty a wra alter dhe leski ynkys warnedhi; a brenn shittim ty a's gwra.

²Unn kevelin a vydh hy hys ha kevelin hy les; hi a vydh pedrek, ha dew gevelin a vydh hy ughelder; hy hern a vydh a unn rann gensi.

³Ha ty a wra hy gorowra gans owr pur, hy fenn ha'y thenwennow a-dro ha'y hern; ha ty a wra rygdhi kylgh a owr a-derdro.

⁴Ha diw lagasenn owrek ty a wra rygdhi; yn-dann hy hylgh dhe'n dhew denewen a-dal dhedhi ty a's gwra, hag i a wra synsi an gwelynni gansa may fydh degys.

⁵Ty a wra an gwelynni a brenn shittim ha'ga gorowra.

⁶Ha ty a wra aga gorra a-rag an vayl usi ryb argh an dustuni, a-rag an dregeredhva usi a-ugh an dustuni, le may hwrav metya genes.

⁷Hag Aron a lesk ynkys hweg warnedhi; pub myttin pan bareus an lugern ev a'n lesk.

⁸Ha pan bareus Aron an lugern gorthugherweyth, ev a'n lesk, an ynkys pub-dydhyek a-rag an ARLOEDH der agas henedhow.

⁹Ny wredh offrynna ynkys astranj warnedhi, nag offrynn leskys, nag offrynn greun; ha ny dhiverydh offrynn diwes warnedhi.

¹⁰Aron a wra prenedh war hy hern unnweyth y'n vlydhen; gans goes offrynn pegh an prenedh ev a wra prenedh ragdho unnweyth y'n vlydhen der agas henedhow; yth yw an moyha sans dhe'n ARLOEDH.

¹¹An ARLOEDH a leveris dhe Moyses,

¹²Pan gemmerydh niveryans mebyon Ysrael, ena peub a re daspren ragdho ev y honan dhe'n ARLOEDH pan y's niverydh, ma na vo pla yn aga mysk pan y's niverydh.

¹³Peub a dremen dhe'n re reknys seulabrys a re hanter shekel, war-lergh shekel an sentri (an shekel yw ugens gera), hanter shekel profys dhe'n ARLOEDH.

¹⁴Peub a dremen dhe'n re reknys, a ugens bloedh ha moy, a re offrynn dhe'n ARLOEDH.

¹⁵Ny wra an den rych ri moy, ha ny wra an den boghosek ri le, ages an hanter shekel, pan wrewgh offrynn dhe'n ARLOEDH dhe wul prenedh rag agas enevow.

¹⁶Ha ty a gemmer arghans an prenedh dhiworth mebyon Ysrael, ha'y ordena rag gonis tylda an kuntelles, may tokko mebyon Ysrael yn kovheans a-rag an ARLOEDH rag gul prenedh ragowgh agas honan.

¹⁷An ARLOEDH a leveris dhe Moyses,

¹⁸Ynwedh ty a wra golghell a vrons, dhedhi sel a vrons, rag omwolghi. Ha ty a wra hy gorra yntra tylda an kuntelles ha'n alter, ha ty a wra gorra dowr ynni,

¹⁹ganso may hwra Aron ha'y vebyon golghi aga diwla ha'ga threys.

²⁰Pan ons a-ji dhe dylda an kuntelles, po pan dhons nes dhe'n alter dhe venystra, dhe leski offrynn dre dan dhe'n ARLOEDH, i a wra omwolghi yn dowr, ma na varwons.

²¹I a wolgh aga diwla ha'ga threys, ma na varwons; y fydh dhedha ordenans bys vykken, dhodho ev ha dh'y dhiyskynnysi der an henedhow.

²²Ynwedh, an ARLOEDH a leveris dhe Moyses,

²³Kemmer dhis an gwella spisyow: a lin myrr pymp kans shekel, hag a ginnamon hweg y vlas hanter an myns, henn yw dew kans ha hanter-kans, hag a galamus[8] hweg y sawer dew kans ha hanter-kans,

²⁴hag a gassia pymp kans, war-lergh shekel an sentri, hag a oyl oliv unn hin;

²⁵ha ty a wra a'n re ma unyent, kemmyskys avel gans perfumyer; oyl untya sans y fydh.

²⁶Ha ganso ty a wra untya tylda an kuntelles hag argh an dustuni,

²⁷ha'n voes ha'y daffar oll, ha'n kantoler ha'y dhaffar, ha'n alter a ynkys,

²⁸ha'n alter a offrynnow leskys gans oll hy daffar ha'n wolghell ha'y sel;

²⁹ty a wra aga sakra may fons an moyha sans; pypynag a's tocchyo a dheu ha bos sans.

³⁰Ha ty a wra untya Aron ha'y vebyon, ha'ga sakra, ma'm serfyons avel oferysi.

³¹Ha ty a lever dhe vebyon Ysrael, ‘Hemma a vydh ow oyl sans rag untya der agas henedhow.

³²Ny vydh dinewys war gig tus, ha ny wrewgh oyl arall haval dhodho yn y gemmysk; sans yw, hag y fydh sans dhywgh.

³³Neb a gemmysko oyl avello po neb a worro anodho war estren a vydh treghys a'y bobel.’

³⁴Ha'n ARLOEDH a leveris dhe Moyses, Kemmer spisyow hweg, stakte, hag onygha, ha galbanum, spisyow hweg gans frankynkys pur (a bubonan anedha y fydh rannow par),

³⁵ha gul ynkys kemmyskys avel gans perfumyer, sellys, pur ha sans,

³⁶ha nebes anodho ty a val dhe bolter, ha gorra rann anodho a-rag an dustuni yn tylda an kuntelles le may hwrav metya genes; y fydh ragowgh an moyha sans.

³⁷Ha'n ynkys a wredh herwydh y gemmysk, ny vydh ragowgh agas honan; y fydh ragowgh sans dhe'n ARLOEDH.

³⁸Piwpynag a wrello nebes haval dhodho dh'y dhevnydhya avel perfum a vydh treghys a'y bobel.