Read Kernewek Eksodus 31 Bible Online

Eksodus 31 - Kernewek bible

Eksodus 31

¹An ARLOEDH a leveris dhe Moyses,

²Mir, my re elwis dre hanow Besalel, mab Uri, mab Hur, a loeth Yuda:

³ha my re'n lenwis gans spyrys Duw, gans furneth ha konvedhes, gans skians hag oll kreftweyth,

⁴dhe dhevisya patronyow konnyk, dhe weytha gans owr, arghans ha brons,

⁵dhe dreghi meyn dh'aga desedha, ha dhe gervya prenn, rag gweyth yn pub kreft.

⁶Hag otta, my re'n untyas ganso Oholiab, mab Ahisamak, a loeth Dan; ha my re ros sleyghneth dhe bub krefter konnyk may hwrellons pup-tra re erghis dhis:

⁷tylda an kuntelles, hag argh an dustuni, ha'n dregeredhva usi warnedhi, ha mebel oll an tylda,

⁸an voes ha'y daffar, ha'n kantoler pur gans y dhaffar oll, ha'n alter a ynkys,

⁹ha'n alter a offrynn leskys gans hy daffar oll, ha'n wolghell ha'y sel,

¹⁰ha'n gwiskasow fin plethys, gwiskas sans Aron an oferyas ha dillas y vebyon, dh'aga gonis avel oferysi,

¹¹hag oyl an untyans ha'n ynkys hweg rag an tyller sans. Herwydh oll re erghis dhis i a wra.

¹²Ha'n ARLOEDH a leveris dhe Moyses,

¹³Lavar dhe vebyon Ysrael, ‘Hwi a wra gwitha ow sabotys, rag hemm yw arwoedh yntra my ha hwi der agas henedhow, may hwodhvowgh my, an ARLOEDH, dh'agas sanshe.

¹⁴Hwi a wra gwitha an sabot, rag y vos sans dhywgh; peub a'n defol a vydh gorrys dhe'n mernans; piwpynag a wrello ober vyth ynno, an enev na a vydh treghys a-dhiworth y bobel.

¹⁵Hwegh dydhweyth a ober a vydh gwrys, mes an seythves dydh yw sabot a bowes, sans dhe'n ARLOEDH; piwpynag a wrello ober vyth dydh an sabot a vydh gorrys dhe'n mernans.

¹⁶Ytho mebyon Ysrael a wra gwitha an sabot, ow kul vri a'n sabot der aga henedhow, avel kevambos bys vykken.

¹⁷Arwoedh yw bys vykken yntra my ha mebyon Ysrael an ARLOEDH dhe wruthyl nev ha nor yn hwegh dydh, hag y'n seythves dydh ev a bowesas, hag a veu diskwithys.’

¹⁸Ha wosa gorfenna kewsel ganso war venydh Sinay, ev a ros dhe Moyses diw leghenn an dustuni, leghennow a ven, skrifys gans bys Duw.