Read Kernewek Eksodus 34 Bible Online

Eksodus 34 - Kernewek bible

Eksodus 34

¹An ARLOEDH a leveris dhe Moyses, ‘Fols diw leghenn a ven haval dhe'n kynsa; ha my a wra skrifa war an leghennow an geryow esa war an kynsa leghennow, a derrsys.

²Bydh parys myttinweyth hag yskynn y'n myttin dhe venydh Sinay, ha sav ragov ena war benn an menydh.

³Ny dheu denvyth genes, ha na as denvyth dhe vos gwelys yn tyller vyth y'n menydh; na as flokkys na greow dhe beuri a-rag an menydh na.’

⁴Ytho ev a folsas diw leghenn a ven avel an kynsa; hag y sevis myttin a-varr hag yskynna menydh Sinay, dell worhemmynnsa an ARLOEDH dhodho, ha kemmeres yn y dhorn diw leghenn a ven.

⁵Ha'n ARLOEDH a dhiyskynnas y'n gommolenn ha sevel ganso ena, ha gelwel y hanow: an ARLOEDH.

⁶An ARLOEDH a dremenas a-ragdho ha gelwel, ‘An ARLOEDH, an ARLOEDH, Duw truedhek ha grassyes, lent ow serri ha leun a dregeredh ha lelder,

⁷ow kwitha tregeredh rag milyow, ow kava kammweyth ha kammdremenans ha pegh, mes neb na as an re gablus heb kessydhyans, ow korra kammweyth an tasow war an fleghes, ha war fleghes an fleghes dhe'n tressa ha'n peswora henedh.’

⁸Ha Moyses a fistenas dhe omblegya, hag a wordhyas.

⁹Hag y leveris, ‘Mar kevis lemmyn gras y'th wolok, A Arloedh, my a'th pys, gwres an Arloedh mones yn agan mysk, kynth yw pobel kales hy hilbenn; ha gav agan kammweyth ha'gan pegh, ha kemmer ni rag dha eretons.’

¹⁰Hag ev a leveris, Otta, my a wra dhis kevambos. A-rag oll dha bobel my a wra anethow a'n par na vons gwrys war oll an norvys nag yn py kenedhel bynag; hag oll an bobel mayth esos yn aga mysk a wra gweles ober an ARLOEDH rag yth yw tra euthyk hag a wrav genes.

¹¹Gwith orth an pyth a worhemmynnav dhis hedhyw. Otta, my a worr yn-mes a-ragos an Amorysi, an Kananysi, an Hittysi, an Perizzysi, an Hivysi, ha'n Yebusysi.

¹²Kemmer with ma na wrylli kevambos gans annedhysi an vro mayth esos ow mones, ma na dheffo ha bos antell yn agas mysk.

¹³Ty a derr dhe'n dor aga alteryow, ha terri dhe demmyn aga feulveyn, ha treghi aga Asherim,

¹⁴rag ny wordhydh ken Duw, rag an ARLOEDH, neb yw y hanow Avius, yw Duw avius;

¹⁵ma na wrewgh kevambos gans annedhysi an tir, ha pan horyons war-lergh aga duwow ha sakrifia dh'aga duwow hag onan anedha a'th helow, ma na dhyppri a'y sakrifis,

¹⁶ha ty a gemmer a'ga myrghes dhe'th vebyon, ha'ga myrghes a wra horya war-lergh aga duwow ha gul dhe'th vebyon horya war-lergh aga duwow.

¹⁷Ny wredh ragos duwow deudh.

¹⁸Goel an bara heb goell ty a wra gwitha. Seyth dydh ty a dheber bara heb goell, dell worhemmynnis dhis, dhe'n prys ordenys y'n mis Abib, rag y'n mis Abib y teuthys yn-mes a Ejyp.

¹⁹Peub a iger an dorr yw dhymm, oll dha warthek gorow, kynsa-genys an vugh ha'n dhavas.

²⁰Kynsa-genys an asen ty a dhaspren gans oen, po mar ny'n dasprenydh, ty a wra terri y gonna. Kynsa-genys oll dha vebyon ty a wra dasprena. Na ny wra nagonan omdhiskwedhes a-ragov gwag y dhiwleuv.

²¹Hwegh dydh ty a wra oberi, mes y'n seythves dydh ty a wra powes; yn termyn aras ha trevas ty a wra powes.

²²Ha ty a wra gwitha dy'goel an seythunyow, kynsa frut an gwaneth ha goel an kuntell dhe benn an vlydhen.

²³Teyrgweyth y'n vlydhen y hwra omdhiskwedhes oll dha re worow a-rag an Arloedh DUW, Duw Ysrael.

²⁴Rag my a wra fesya kenedhlow a-ragos, ha lesa dha oryon; ha ny'n jevydh denvyth hwans dhe'th tir, pan yskynnowgh dhe omdhiskwedhes a-rag an ARLOEDH dha Dhuw teyrgweyth y'n vlydhen.

²⁵Ny wrewgh profya goes ow sakrifis gans goell; na ny vydh gesys offrynn goel an pask bys y'n myttin.

²⁶Kynsa frut dha dhor ty a wra dri dhe ji an ARLOEDH dha Dhuw. Ny wrewgh hwi bryjyon mynn yn leth y vamm.

²⁷Ha'n ARLOEDH a leveris dhe Moyses, Skrif an geryow ma; herwydh an geryow ma my re wrug kevambos genes ha gans Ysrael.

²⁸Hag y feu ena gans an ARLOEDH dew-ugens dydh ha dew-ugens nos; ha ny dhybris bara nag eva dowr. Hag y skrifas war leghennow geryow an kevambos, an deg gorhemmynn.

²⁹Pan dhiyskynnas Moyses a venydh Sinay, ha diw leghenn an dustuni yn y dhorn dell dhiyskynnas a'n menydh, ny wodhya Moyses kroghen y fas dhe splanna, rag ev re bia ow kewsel gans Duw.

³⁰Hag Aron ha mebyon Ysrael oll, pan welsons Moyses, otta, kroghen y vejeth a splannas, hag own a's teva a dhos yn y ogas.

³¹Mes Moyses a elwis dhedha; hag Aron ha hembrenkysi oll an kuntelles a dhehwelis dhodho, ha Moyses a gewsis gansa.

³²Hag a-wosa mebyon Ysrael oll a nesas, hag ev a worhemmynnis dhedha pup-tra re gowssa an ARLOEDH dhodho war venydh Sinay.

³³Ha pan worfennsa Moyses ow kewsel gansa, ev a worras kudhlenn war y vejeth;

³⁴mes pan e Moyses a-ji a-rag an ARLOEDH dhe gewsel ganso, y tiwiska an gudhlenn; bys pan dho yn-mes; hag y to yn-mes ha derivas dhe vebyon Ysrael an pyth a vedha gorhemmynnys dhodho.

³⁵Mebyon Ysrael a welas fas Moyses, bos kroghen fas Moyses ow splanna; ha Moyses a wiskas an gudhlenn arta war y vejeth, bys pan dheuth a-ji dhe gewsel ganso.