Read Kernewek Eksodus 36 Bible Online

Eksodus 36 - Kernewek bible

Eksodus 36

¹Besalel hag Oholiab ha pub krefter konnyk ynno may hworras Duw furneth ha konvedhes dhe wodhvos gul oll ober vyth yn gwrians an sentri a wra oberi herwydh oll re worhemmynnis an ARLOEDH.

²Ha Moyses a elwis Besalel hag Oholiab ha pub krefter konnyk ynno may hworras Duw godhvos yn y golonn, peub a vo kolonnek, dhe dhos dhe wul an ober;

³hag i a dhegemmeras dhiworth Moyses oll an offrynnow re dhrosa mebyon Ysrael yn ober servis an sentri. I a besyas dri offrynnow bolonjedhek pub myttin,

⁴may teuth pub krefter konnyk esa ow kul pub eghenn a oberennow war an sentri, pubonan dhiworth an oberenn esa ow kul,

⁵ha leverel dhe Moyses, ‘An bobel a dhre moy es lowr dhe wul an ober re worhemmynnis an ARLOEDH y wul.’

⁶Ytho Moyses a ros gorhemmynn, ha'n ger a veu gelwys der an kamp, ‘Na as gour na benyn dhe wul ober moy rag offrynn rag an sentri.’ Yndellma an bobel a veu lettys a dhri moy;

⁷rag an daffar a's tevo o lowr dhe wul an ober oll ha moy.

⁸Ha pub krefter konnyk yn mysk an weythoryon neb a wre ober an tabernakel a wrug deg kroglenn; gwiys gans sendal plethys ha pann glas ha purpur ha kogh ha cherubim, ober gweythor kweth.

⁹Hys pub kroglenn o eth kevelin warn ugens; ha les pub kroglenn peswar kevelin; ha pub kroglenn a's tevo an keth musur.

¹⁰Hag ev a goplas pymp kroglenn an eyl dh'y ben, ha'n pymp kroglenn arall ev a goplas an eyl dh'y ben.

¹¹Hag ev a wrug stagellow a bann glas war amal pella kroglenn an kynsa bagas; keffrys ev a's gwrug war amal pella kroglenn an nessa bagas;

¹²ev a wrug hanter-kans stagell dhe'n unn groglenn, hag ev a wrug hanter-kans stagell war amal an groglenn bella a'n nessa sett; yth esa an stagellow an eyl a-dal hy ben.

¹³Hag ev a wrug hanter-kans bagh a owr ha kelmi an kroglennow an eyl dh'y ben gans baghow, may feu an tabernakel unnses dien.

¹⁴Ynwedh ev a wrug kroglennow a vlew gever rag tylda a-ugh an tabernakel; ev a wrug unnek kroglenn.

¹⁵Hys pub kroglenn o deg kevelin warn ugens; ha les pub kroglenn peswar kevelin; an unnek kroglenn a's tevo an keth musur.

¹⁶Ev a goplas pymp kroglenn a'ga honan, ha hwegh kroglenn a'ga honan.

¹⁷Hag ev a wrug hanter-kans stagell war amal an pella kroglenn a'n unn bagas, ha hanter-kans stagell war amal kroglenn an bagas arall.

¹⁸Hag ev a wrug hanter-kans bagh a vrons dhe gopla an tylda war-barth may fe unnses dien.

¹⁹Hag ev a wrug kudhans dhe'n tylda, a greghyn rudhhes a hordhes, ha kudhans a greghyn morhoghes a-ughto.

²⁰Ena ev a wrug framyow rag an tabernakel a brenn shittim, a'ga sav.

²¹Deg kevelin o hys pub fram, ha kevelin ha hanter les pub fram.

²²Pub fram a'n jevo dew denon, rag desedha war-barth; ev a wrug hemma rag oll an framyow a'n tabernakel.

²³Framyow an tabernakel ev a's gwrug yndellma: ugens fram dhe'n barth dhyghow;

²⁴hag ev a wrug ugens sel a arghans yn-dann an ugens fram, diw sel yn-dann unn fram rag y dhew denon, ha diw sel yn-dann fram arall rag y dhew denon.

²⁵Ha dhe nessa tu an tabernakel, dhe'n barth kledh, ev a wrug ugens fram;

²⁶ha'ga ugens sel a arghans, diw sel yn-dann unn fram ha diw sel yn-dann fram arall.

²⁷Ha dhe'n tu a-dryv an tabernakel dhe'n howlsedhes ev a wrug hwegh fram.

²⁸Hag ev a wrug dew fram dhe gornellow an tabernakel dhe'n tu a-dryv.

²⁹Hag i o diberthys dhe-woeles, mes junys dhe-wartha, dhe'n kynsa lagasenn; ev a wrug dew anedha yndellma, rag an dhiw gornell.

³⁰Ytho yth esa eth fram gans aga krawyow a arghans, hwetek kraw, dew graw yn-dann bub fram.

³¹Hag ev a wrug barrys a brenn shittim, pymp dhe'n framyow dhe unn tu a'n tabernakel,

³²ha pymp dhe'n framyow dhe du arall an tabernakel, ha pymp barr dhe framyow an tabernakel dhe'n tu a-dryv, dhe'n howlsedhes.

³³Hag ev a wrug dhe'n barr kres tremena a benn dhe benn yn kres an framyow.

³⁴Hag ev a worlownas an framyow gans owr, ha gul aga lagasennow a owr rag synsi an barrys, ha gorowra an barrys gans owr.

³⁵Hag ev a wrug an vayl a bann glas ha purpur ha kogh ha sendal plethys; i a vydh gwrys gans cherubim, ober gweythor kweth.

³⁶Ha rygdhi ev a wrug peder koloven a shittim, ha'ga gorowra gans owr; aga higennow o a owr, hag ev a deudhis ragdha peder sel a arghans.

³⁷Ynwedh ev a wrug kroglenn rag porth an tylda a bann glas, purpur ha kogh ha sendal plethys, brosys gans brosweyth;

³⁸ha'y fymp koloven gans aga higennow. Ev a worlownas aga fenn-kolovenyow, ha'ga bondow o a owr, mes aga fymp kraw o a vrons.