Read Kernewek Eksodus 37 Bible Online

Eksodus 37 - Kernewek bible

Eksodus 37

¹Besalel a wrug an argh a brenn shittim; dew gevelin ha hanter o hy hys, kevelin ha hanter hy les, ha kevelin ha hanter hy ughelder.

²Hag ev a's gorowras gans owr pur a-ji dhedhi hag a-ves ha gul kylgh a-dro dhedhi.

³Hag ev a deudhis rygdhi peder lagasenn a owr dh'y feder kornell, diw lagasenn dhe'n unn tu ha diw lagasenn dh'y thu arall.

⁴Hag ev a wrug gwelynni a brenn shittim ha'ga gorowra,

⁵ha gorra an gwelynni y'n lagasennow war denwennow an argh, dhe dhoen an argh.

⁶Hag ev a wrug tregeredhva a owr pur; dew gevelin ha hanter o hy hys, ha kevelin ha hanter hy les.

⁷Hag y hwrug dew jerub a owr mortholys; war dhew benn an dregeredhva ev a's gwrug,

⁸unn cherub dhe'n eyl penn, hag unn cherub dh'y gila; a unn rann gans an dregeredhva ev a wrug an jerubim war hy dew du.

⁹An jerubim a lesas aga eskelli war-vann, ow korskeusi an dregeredhva gans aga eskelli; ha'ga fasow an eyl war-tu ha'y gila; yth esa, fasow an jerubim war-tu ha'n dregeredhva.

¹⁰Ev a wrug ynwedh an voes a brenn shittim; dew gevelin o hy hys, kevelin hy les, ha kevelin ha hanter hy ughelder;

¹¹hag ev a's gorowras gans owr pur, ha gul kylgh a owr a-dro dhedhi.

¹²Hag y hwrug a-dro dhedhi fram, dornva y les, ha gul kylgh a owr a-dro dhe'n fram.

¹³Ev a deudhis ragdho peder lagasenn a owr, ha fastya an lagasennow dhe'n peder kornell dh'y beder garr.

¹⁴Ogas dhe'n fram yth esa an lagasennow, avel synsellow dhe'n gwelynni dhe dhoen an voes.

¹⁵Ev a wrug an gwelynni a brenn shittim dhe dhoen an voes, ha'ga gorowra gans owr.

¹⁶Hag ev a wrug an lestri a owr pur a vedha war an voes, hy flatyow ha'y skudellow ha'y bollow ha'y hostrels gansa dhe dhiveri an offrynnow diwes.

¹⁷Ynwedh ev a wrug an kantoler a owr pur. Troes ha gwelenn an kantoler a veu gwrys a weyth mortholys; y hanafow, y dalbennow, ha'y vleujennow o unn rann ganso.

¹⁸Hag yth esa hwegh skorrenn ow mos yn-mes a'y denwennow, teyr skorrenn a'n kantoler yn-mes a unn tenewen ha teyr skorrenn a'n kantoler yn-mes a'n tenewen arall;

¹⁹tri hanaf gwrys avel alamandow, peub ganso talbenn ha bleujenn, war unn skorrenn, ha tri hanaf gwrys avel alamandow peub ganso talbenn ha bleujenn, war an skorrenn arall — hag yndella dhe'n hwegh skorrenn ow mos yn-mes a'n kantoler.

²⁰Ha war an kantoler y honan yth esa peswar hanaf gwrys avel alamandow, gans aga thalbennow ha bleujennow,

²¹ha talbenn unn rann ganso yn-dann gynsa par a'n hwegh skorrenn, talbenn unn rann yn-dann nessa par a'n skorrennow ha talbenn yn-dann an diwettha par a'n skorrennow, ow mos yn-mes anodho.

²²Aga thalbennow ha'ga skorr o a unn rann ganso; an dra dhien o a unn rann a weyth mortholys a owr pur.

²³Hag ev a wrug y seyth lugarn ha'y evelyow ha'ga fadellow-tan a owr pur.

²⁴Ev a'n gwrug, hag oll y dhaffar, a dalent a owr pur.

²⁵Ev a wrug alter an ynkys a brenn shittim; hy hys o unn kevelin, ha'y les o unn kevelin; pedrek o, ha dew gevelin o hy ughelder; hy hern o a unn rann gensi.

²⁶Ev a's gorowras gans owr pur, hy fenn ha'y thenwennow oll a-dro, ha'y hern; hag ev a wrug kylgh a owr a-dro dhedhi,

²⁷ha gul diw lagasenn a owr warnedhi yn-dann hy hylgh dh'y dew denewen hirra, war hy dew denewen, avel synsellow dhe'n gwelynni dh'y doen gansa.

²⁸Hag ev a wrug an gwelynni a brenn shittim, ha'ga gorowra.

²⁹Ev a wrug an oyl sans ynwedh, ha'n ynkys hweg pur, kemmyskys par dell ve gans perfumyer.