Read Kernewek Eksodus 40 Bible Online

Eksodus 40 - Kernewek bible

Eksodus 40

¹An ARLOEDH a leveris dhe Moyses,

²Y'n kynsa dydh a'n kynsa mis ty a dhrehav tabernakel tylda an kuntelles.

³Ha ty a worr ynno argh an dustuni, ha ty a gudh an argh gans an vayl.

⁴Ha ty a dhre an voes a-ji hag araya hy daffar; ha ty a dhre an kantoler a-ji ha settya y lugern.

⁵Ha ty a worr an alter owrek rag an ynkys a-rag argh an dustuni ha settya kroglenn an porth rag an tabernakel.

⁶Ha ty a sett alter an offrynn leskys a-rag daras tabernakel tylda an kuntelles,

⁷ha gorra an wolghell yntra tylda an kuntelles ha'n alter, ha gorra dowr ynni.

⁸Ha ty a bareus an klos a-derdro, ha kregi kroglenn porth an klos.

⁹Ena ty a gemmer oyl untyans an tabernakel ha pup-tra eus ynno, ha'y sakra ha'y vebel oll; hag y hwra dos ha bos sans.

¹⁰Ynwedh ty a wra untya alter an offrynnow leskys ha'y daffar oll, ha sakra an alter; ha'n alter a vydh an moyha sans.

¹¹Ty a wra untya ynwedh an wolghell ha'y sel ha'y sakra.

¹²Ena ty a gyrgh Aron ha'y vebyon dhe dharas tylda an kuntelles, ha'ga golghi gans dowr,

¹³ha gorra war Aron an gwiskas sans, ha ty a wra y untya ha'y sakra, ma'm serfyo avel oferyas.

¹⁴Ty a dhre y vebyon ynwedh ha gorra mantelli warnedha,

¹⁵ha'ga untya, dell untsys aga thas, ma'm serfyons avel oferysi: ha'ga untya a vydh dhedha rag oferyaseth vythkwethek dres aga henedhow.

¹⁶Yndella y hwrug Moyses, herwydh oll a worhemmynnis an ARLOEDH dhodho, yndella ev a wrug.

¹⁷Hag y'n kynsa mis y'n nessa blydhen, yn kynsa dydh an mis, an tabernakel a veu drehevys.

¹⁸Moyses a dhrehevis an tabernakel; ev a worras y selyow, ha settya y framyow, ha gorra y varrow a-ji, ha drehevel y golovenyow;

¹⁹hag ev a lesas an tylda dres an tabernakel, ha gorra kudhans an tylda warnodho, dell worhemmynnsa an ARLOEDH dhe Moyses.

²⁰Hag ev a gemmeras an dustuni ha'y worra y'n argh, ha gorra an gwelynni war an argh, ha settya an dregeredhva a-ugh an argh;

²¹hag ev a dhros an argh a-ji dhe'n tabernakel, ha settya vayl an groglenn, ha kudha argh an dustuni, dell worhemmynnsa an ARLOEDH dhe Moyses.

²²Hag ev a worras an voes yn tylda an kuntelles, a'n barth kledh dhe'n tabernakel, a-ves dhe'n vayl,

²³hag araya an bara warnedhi a-rag an ARLOEDH; dell worhemmynnsa an ARLOEDH dhe Moyses.

²⁴Hag ev a worras an kantoler yn tylda an kuntelles, a-dal an voes, dhe barth dhyghow an tabernakel,

²⁵ha settya an lugern a-rag an ARLOEDH; dell worhemmynnsa an ARLOEDH dhe Moyses.

²⁶Hag ev a worras an alter owrek yn tylda an kuntelles a-rag an vayl,

²⁷ha leski ynkys hweg warnedhi; dell worhemmynnsa an ARLOEDH dhe Moyses.

²⁸Hag ev a worras yn hy le kroglenn porth an tabernakel.

²⁹Hag ev a settyas alter an offrynn leskys dhe dharas tabernakel tylda an kuntelles, hag offrynna warnedhi an offrynn leskys ha'n offrynn greun; dell worhemmynnsa an ARLOEDH dhe Moyses.

³⁰Hag ev a worras an wolghell yntra tylda an kuntelles ha'n alter, ha gorra dowr ynni rag omwolghi,

³¹ganso may hwrug Moyses hag Aron ha'y vebyon golghi aga diwla ha'ga threys;

³²pan ethons a-ji dhe dylda an kuntelles, ha pan dhons nes dhe'n alter, i a omwolghas, dell worhemmynnsa an ARLOEDH dhe Moyses.

³³Hag ev a dhrehevis an klos a-dro dhe'n tabernakel ha'n alter, ha settya kroglenn porth an klos. Yndella Moyses a worfennas y ober.

³⁴Ena an gommolenn a gudhas tylda an kuntelles, ha golewder an ARLOEDH a lenwis an tabernakel.

³⁵Ha ny ylli Moyses entra tylda an kuntelles drefenn an gommolenn dhe bowes warnodho, ha golewder an ARLOEDH a lenwis an tabernakel.

³⁶Pan vedha an gommolenn drehevys dhiwar an tabernakel, mebyon Ysrael e war-rag yn oll aga herdhow;

³⁷mes mar ny veu drehevys an gommolenn, nyns ethons war-rag bys y'n jydh may feu drehevys.

³⁸Rag yn oll aga herdhow yth esa kommolenn an ARLOEDH war an tabernakel dydhweyth, hag yth esa tan ynni[10] nosweyth, a-wel chi Ysrael oll.