Read Kernewek Eksodus 8 Bible Online

Eksodus 8 - Kernewek bible

Eksodus 8

¹Ha'n ARLOEDH a leveris dhe Moyses, ‘Ke bys yn Faro ha leverel dhodho, “Yndellma y lever an ARLOEDH: Gas ow fobel dhe vones ma'm serfyons.[4]

²Mes mara's neghydh a vones, otta, my a wra plagya oll dha bow gans kwilkynyow;

³kwilkynyow a wra hesya y'n avon hag i a wra dos bys y'th chi, a-ji dhe'th chambour ha war dha weli, hag a-ji dhe ji dha servysi ha'th pobel, hag a-ji dhe'th fornow ha'th newyow-toesa;

⁴an kwilkynyow a wra dos warnas ha war dha bobel ha war oll dha servysi.” ’

⁵Ha'n ARLOEDH a leveris dhe Moyses, ‘Lavar dhe Aron, “Ystynn dha dhorn ha'th welenn dres an avonyow, dres an dowrgleudhyow, ha dres an pollow, ha gul dhe gwilkynyow dos war bow Ejyp.” ’

⁶Ytho, Aron a ystynnas y dhorn dres dowrow Ejyp; ha'n kwilkynyow a dheuth ha kudha pow Ejyp.

⁷Mes an hudoryon a wrug an keth tra der aga husow ha dri kwilkynyow war bow Ejyp.

⁸Ena Faro a elwis Moyses hag Aron, ha leverel, ‘Pys an ARLOEDH may kemmerro an kwilkynyow ahanav hag a'm pobel; ha my a wra gasa an bobel dhe vones ha sakrifia dhe'n ARLOEDH.’

⁹Moyses a leveris dhe Faro, ‘Gorhemmynn dhymm, my a'th pys, p'eur y tal dhymm pysi ragos ha rag dha servysi ha'th pobel, may fo distruys an kwilkynyow ahanas ha'th chiow ma na vons gesys marnas y'n Nil.’

¹⁰Hag y leveris, ‘A-vorow.’ Moyses a leveris, ‘Bedhes par dell leverydh, may hwodhvi nag eus nagonan avel an ARLOEDH agan Duw.

¹¹An kwilkynyow a wra diberth ahanas hag a'th chiow hag a'th servysi hag a'th pobel; ny vydhons gesys marnas y'n Nil.’

¹²Ytho Moyses hag Aron eth yn-mes a Faro; ha Moyses a grias war an ARLOEDH a-dro dhe'n kwilkynyow a dhrosa war Faro.

¹³Ha'n ARLOEDH a wrug herwydh ger Moyses; an kwilkynyow a verwis a'n chiow ha'n godrevow ha'n parkow.

¹⁴Hag i a's kuntellas yn bernyow, ha'n tir a flerya.

¹⁵Mes Faro pan welas bos hedh, ev a galeshas y golonn, ha ny vynna goslowes orta; dell lavarsa an ARLOEDH.

¹⁶Ena an ARLOEDH a leveris dhe Moyses, ‘Lavar dhe Aron, “Ystynn dha welenn ha gweskel doust an dor may teffo ha bos gwibes dre bow Ejyp oll.” ’

¹⁷Hag i a'n gwrug; Aron a ystynnas y dhorn ha'y welenn, ha gweskel doust an dor, hag y teuth gwibes war dhen ha best; oll doust an dor a dheuth ha bos gwibes dre bow Ejyp oll.

¹⁸An hudoryon a assayas der aga husow dhe dhri gwibes yn-rag, mes ny allsons. Ytho yth esa gwibes war dhen ha best.

¹⁹Ha'n hudoryon a leveris dhe Faro, ‘Hemm yw bys Duw.’ Mes kolonn Faro o kaleshes, ha ny vynna koela orta; dell lavarsa an ARLOEDH.

²⁰Ena an ARLOEDH a leveris dhe Moyses, ‘Sav a-varr myttinweyth ha sav a-rag Faro, hag ev ow mos yn-mes dhe'n dowr, ha lavar dhodho, “Yndellma y lever an ARLOEDH: Gas ow fobel dhe vones ma'm serfyons.

²¹Poken, mar ny esydh ow fobel dhe vones, otta, y tannvonav hesow kelyon warnas ha war dha servysi ha war dha bobel, hag a-ji dhe'th chiow; ha chiow Ejyp a vydh lenwys gans hesow kelyon, hag ynwedh an dor le may sevons.

²²Mes y'n jydh na my a wra settya pow Goshen a-denewen, le may ma ow fobel trigys, ma na vo ena hesow kelyon; may hwodhvi my dhe vos an ARLOEDH yn mysk an nor.

²³Yndellma y hworrav dibarth ynter ow fobel ha'th pobel jy. Erbynn a-vorow y fydh an arwoedh ma.” ’

²⁴Ha'n ARLOEDH a wrug yndellma; y teuth hesow meur a gelyon a-ji dhe ji Faro ha dhe jiow y servysi; ha dre bow Ejyp oll an tir a veu diswrys drefenn an kelyon.

²⁵Ena Faro a elwis Moyses hag Aron, ha leverel, ‘Kewgh, sakrifiewgh dh'agas Duw a-ji dhe'n tir.’

²⁶Mes Moyses a leveris, ‘Ny via gwiw gul yndella; rag ni a wra sakrifia dhe'n ARLOEDH agan Duw offrynnow yw kasadow dhe'n Ejyptianys. Mar sakrifiyn offrynnow kesys gans an Ejyptianys a-rag aga dewlagas, a ny wrons i agan labydha?

²⁷Res yw dhyn gul vyaj a dri dydh y'n gwylvos ha sakrifia dhe'n ARLOEDH agan Duw par dell worhemmynnis dhyn.’

²⁸Ytho Faro a leveris, ‘My a wra agas gasa dhe vones, dhe sakrifia dhe'n ARLOEDH agas Duw y'n gwylvos; marnas ny wrewgh mones pur bell. Gwrewgh y bysi ragov.’

²⁹Ena Moyses a leveris, ‘Otta, yth av ahanas ha my a wra pysi an ARLOEDH may tibartho an hesow a gelyon a Faro, a'y servysi, a'y bobel, a-vorow; marnas na as Faro dhe dhyghtya yn fals arta ma na asso an bobel dhe vones dhe sakrifia dhe'n ARLOEDH.’

³⁰Ytho Moyses eth yn-mes dhiworth Faro ha pysi an ARLOEDH.

³¹Ha Duw a wrug dell worhemmynnis Moyses, ha dilea an hesow a gelyon a Faro, a'y servysi hag a'y bobel; ny veu gesys nagonan.

³²Mes Faro a galeshas y golonn an prys ma ynwedh, ha ny asas an bobel dhe vones.