Read Kernewek Job 10 Bible Online

Job 10 - Kernewek bible

Job 10

¹‘Kasadow yw ow bewnans dhymm; my a lever ow krodhvol yn rydh; my a gews yn hwerowder ow enev.

²My a lever dhe Dhuw, Na'm dampen; lavar dhymm, pyth yw dha guhudhans er ow fynn.

³A hevel bos da dhis arwaska, kasa ober dha dhiwleuv ha splanna war dowlow tebelwesyon?

⁴Eus dewlagas a gig dhis? A welydh kepar dell wel mab-den?

⁵Yw dha dhydhyow kepar ha dydhyow mab-den, po dha vlydhynyow kepar ha blydhynyow gour,

⁶may hwovynnydh a-dro dhe'm kammweyth ha hwilas ow fegh,

⁷kyn hwodhes nag ov kablus, ha nyns eus denvyth dhe dhelivra yn-mes a'th leuv?

⁸‘Dha dhiwleuv a'm formyas hag a'm gwrug; ha lemmyn ty a dreyl hag a'm distru.

⁹Porth kov, ty dhe'm gul a bri; a vynnydh ow threylya dhe dhoust arta?

¹⁰A ny'm diversys kepar ha leth ha'm kowla kepar ha keus?

¹¹Ty a'm dillesas gans kroghen ha kig, ha'm gwia war-barth gans eskern ha giow.

¹²Ty a wrontyas dhymm bewnans ha tregeredh, ha dha vern re withas ow spyrys.

¹³‘Mes ty a gudhas an taklow ma y'th kolonn; my a woer y feu hemma y'th vrys.

¹⁴Mar peghav, ty a'm merk, ha ny'm assoylydh a'm kammweyth.

¹⁵Mars ov kablus, go-vy! Mars ov gwiryon, ny allav drehevel ow fenn, drefenn ow bos lenwys a veth ha gwalghys a alar.

¹⁶Mar trehavav ow fenn, ty a'm helgh kepar ha lew; hag arta gul marthusyon er ow fynn.

¹⁷Ty a dhre dustuni nowydh er ow fynn, ha moghhe dha sorr orthiv; ty a dhre luyow nowydh er ow fynn.

¹⁸‘Prag y'm dresys yn-mes dhiworth an brys? Unnweyth a kwrellen vy tremena kyns lagas dhe'm gweles,

¹⁹a pen vy kepar dell na vien, degys dhiworth an brys dhe'n bedh.

²⁰A nyns yw boghes dydhyow ow bewnans? Gas vy ow honan, may hylliv kavoes nebes konfort

²¹kyns my dhe vos le ma na dhehwelav, dhe'n pow a dewolgow ha tewlder down,

²²dhe bow a dewlder down, a dhuder ha deray, le mayth yw golow kepar ha duder.’