Read Kernewek Job 13 Bible Online

Job 13 - Kernewek bible

Job 13

¹‘Otta, ow lagas re welas oll hemma, ow skovarn re woslowas orto ha'y gonvedhes.

²An pyth a wodhowgh, my ynwedh a'n goer; nyns ov isella agesowgh.

³Mes my a vynn kewsel orth an Ollgalloesek, hag yma hwans dhymm a dhadhla an kas gans Duw.

⁴Saw byttegyns hwi a'm gwynngalgh gans gowyow, koeg vedhogyon owgh hwi oll.

⁵Unnweyth a mynnewgh tewel! Ragowgh hwi, y fia furneth.

⁶Klewewgh lemmyn ow dadhel, ha goslowewgh orth pledyansow ow diwweus.

⁷A vynnowgh kewsel yn trog a-barth Duw? A vynnowgh leverel anewnder ragdho?

⁸A vynnowgh diskwedhes faverans trohag ev, a vynnowgh pledya an kas a-barth Duw?

⁹A vydh da genowgh pan wra aga gorthapposya? Po a yllowgh y doella, kepar dell doellir den?

¹⁰Ev a wra agas keredhi yn sur mar tiskwedhowgh faverans yn-dann gel.

¹¹A ny wra y veuredh agas broweghi, ha'n agha anodho koedha warnowgh?

¹²Agas lavarennow yw henlavarow a lusu, agas gorthybow yw gorthybow a bri.

¹³‘Tewewgh, ha gesiwgh my dhe gewsel, ha re dheffo dhymm pynag a dheffo.

¹⁴Prag y kemmerav ow hig y'm dyns, ha gorra ow bewnans y'm dorn?

¹⁵Kyn hwra ev ow ladha; yma govenek dhymm; byttegyns my a dhefend ow fordhow a-rag y fas.

¹⁶Hemma a vydh ow selwyans, rag ny vedh den didhuw dos a-ragdho.

¹⁷Goslowewgh gans rach orth ow geryow, ha gesiwgh ow diskleryans dhe vos yn agas diwskovarn.

¹⁸Otta, my re bareusis ow has; my a woer y fydhav justifiys.

¹⁹Eus nebonan a yll dri kuhudhans er ow fynn? Mar pe, my a via taw ha tremena.

²⁰‘Gront dhymm an dhew dra ma, a Dhuw ena ny wrav omgudha dhiworth dha fas:

²¹kildenn dha leuv pell dhiworthiv, ha na as agha ahanas dhe'm broweghi.

²²Ena galw, ha my a worthyp, po gas vy dhe gewsel, ha gorthyp dhymm.

²³Py lies yw ow hammweythresow ha'm peghosow? Gwra dhymm godhvos ow threuspass ha'm pegh.

²⁴Prag y kudhydh dha fas, ha krysi ow bos dha eskar?

²⁵A vynnydh tormentya delenn hwythys gans an gwyns? a vynnydh chasya kulyn sygh?

²⁶Rag ty a skrif taklow hwerow er ow fynn, ha gul dhymm erita kammweythresow ow yowynkneth.

²⁷Ty a worr ow dewdroes y'n stokkys, ha mires orth oll ow hynsyow; ty a gerv dha hanow y'm konna-troes.

²⁸Den a dhe goll kepar ha tra bodrek, kepar ha dillas dybrys gans goedhanes.