Read Kernewek Job 15 Bible Online

Job 15 - Kernewek bible

Job 15

¹Ena Elifaz an Temanyas a worthybis:

²‘A dal den fur gorthybi gans godhvos gwynsek, ha lenwel y dorr a wyns an est?

³A dal ev dadhla gans kows nag yw dhe les, po gans arethyow nag eus dhedha prow?

⁴Dar, ty a bellha an own a Dhuw, ha lesta ombreder a-dheragdho.

⁵Rag dha dhrogober a dhysk dha anow, ha ty a dhewis taves an dus fel.

⁶Dha anow dha honan a'th tampen, na my; dha dhiwweus dha honan a dhustuni er dha bynn.

⁷‘Osta an kynsa den a veu dineythys? Po a veus genys kyns an breow?

⁸A woslewsys yn konsel kevrinek Duw? Hag a withydh furneth dhiso dha honan?

⁹Pandr'a wodhes na wodhon ni? Pandr'a gonvedhydh nag yw kler dhyn ni?

¹⁰Genen yma ha'n dus loes aga blew ha tus pur goth, kottha yn feur ages dha das.

¹¹Yw solas Duw re vyghan ragos, po ger kewsys genes yn hwar?

¹²Prag y hwra dha golonn dha dhoen dhe-ves? Ha prag y hwra dha dhewlagas lughesi,

¹³may treylydh dha spyrys erbynn Duw, ha gasa dhe'n geryow na mos yn-mes a'th hanow?

¹⁴Pyth yw mab-den, may hyll bos glan? po ev neb yw dineythys a venyn, may hyll bos gwiryon?

¹⁵Otta, ny worr Duw fydhyans yn y syns, ha nyns yw an nevow glan yn y wolok;

¹⁶pyseul dhe le yn mab-den yw kasadow ha legrys, yn gour a yv kammhynseth kepar ha dowr!

¹⁷‘My a dhiskwa dhis, goslow orthiv; ha'n pyth re welis my a dheriv —

¹⁸an pyth a veu disklerys gans tus fur, ha na veu kudhys ragdha gans aga thasow,

¹⁹dhe neb aga honan y feu res an tir, ha ny dremenas estren yn aga mysk.

²⁰An tebelwas a berth payn dres oll y dhydhyow, ha kreunys yw rag an turant dres oll y vlydhynyow.

²¹Yma sonyow euthyk yn y dhiwskovarn; yn siwena an distruer a dheu warnodho.

²²Ny grys ev y tehwel yn-mes a dewlder, ha destnys yw rag an kledha.

²³Ev a wander a-dro rag bara, ow leverel, “Ple'mava?” Ev a woer bos dydh an tewlder yn y ogas;

²⁴ahwer hag ankres a wra y euthega; i a warthev warnodho, kepar ha myghtern parys rag batel;

²⁵rag ev re ystynnas y leuv erbynn Duw, ha krevhe y honan erbynn an Ollgalloesek,

²⁶ow poenya er y bynn gans y benn yn rag, gans skoes tew y vothow.

²⁷‘Kyn fo y fas kudhys gans blonek, ha kyn fo meur a vlonek war y dhiwglun,

²⁸ev a vydh trigys yn sitys ynyal, hag yn chiow ma na drig denvyth ynna, hag a verr spys y fydhons magoryow.

²⁹Ny vydh ev rych na fella ha ny bes y wolusogneth, ha ny omles y wreydh[5] der an wlas;

³⁰ny wra ev skapya dhiworth an tewlder; an flamm a wra sygha y skyll, ha'y vleujyow a vydh hwythys dhe-ves gans an gwyns.

³¹Na drestyes ev yn euveredh, owth omdoella, rag gwakter a vydh y wober.

³²Y balmwydhenn[6] a wedher kyns y dermyn, ha ny vydh glas y skorrenn.

³³Ev a vydh avel gwinbrenn a shak dhe-ves y rappys anadhves, kepar hag olewbrenn a dewl dhe-ves y vleujyow.

³⁴Rag kuntelles an dus dhidhuw yw anvap, ha tan a lesk an tyldow a falswober.

³⁵I a gonsev dregynn, ha dineythi droktra, ha'ga thorr a dharbar toell.’