Read Kernewek Job 17 Bible Online

Job 17 - Kernewek bible

Job 17

¹‘Terrys yw ow spyrys, difeudhys yw ow dydhyow, parys yw an ynkleudhva ragov.

²Yma skornyoryon a-dro dhymm yn sur, ha'm lagas a bes ow mires orth aga eskarogeth.

³‘Sett goestel ragov genes lemmyn; piw arall a vynn shakya leuv genev?

⁴Rag ty re geas aga holonn dhe gonvedhes, rakhenna ny's gesydh dhe dryghi.

⁵Neb a guhudh y gowetha rag gober, dewlagas y vebyon a fyll.

⁶‘Ev a wrug dhymm bos henlavar a'n poblow, ha tus a drew y'm fas.

⁷Ow lagas re dheuth ha bos gwann drefenn duwon, ha kepar ha skeus yw oll ow eseli.

⁸An re ewnhynsek a skruth gans hemma, ha'n den divlam yw yntanys erbynn an den didhuw.

⁹An den gwiryon a bes war y fordh, ha'n den glan y dhiwleuv yw krevhes moy ha moy.

¹⁰Mes hwi oll, dewgh, ha dehwelewgh arta! Ny gavav unn den fur yn agas mysk.

¹¹Tremenys yw ow dydhyow, terrys yw ow thowlow, ha hwansow ow holonn.

¹²Nosweyth a vydh dydhweyth, yn-medhons, golow yw ogas; mes yth esov yn tewlder.

¹³Mar kwaytyav ifarn dhe vos ow chi, ha lesa ow gweli y'n tewlder,

¹⁴mar lavarav dhe'n pytt, “Ty yw ow thas”, ha dhe'n gontronenn, “Ty yw ow mamm ha'm hwoer”,

¹⁵ple'ma ow govenek lemmyn? Piw a yll gweles govenek ragov?

¹⁶A wra ev diyskynna genev dhe ifarn? A wren ni diyskynna war-barth a-berth y'n doust?’