Read Kernewek Job 2 Bible Online

Job 2 - Kernewek bible

Job 2

¹Yth esa dydh pan dheuth mebyon Duw rag sevel a-dherag an ARLOEDH, ha Satnas a dheuth yn aga mysk ynwedh rag sevel a-dherag an ARLOEDH.

²An ARLOEDH a leveris dhe Satnas, ‘A-ble osta devedhys?’ Satnas a worthybis dhe'n ARLOEDH, ‘A-dhiworth gwandra omma hag ena war an norvys, hag a-dhiworth kerdhes a-dro warnodho.’

³An ARLOEDH a leveris dhe Satnas, ‘A bredersys a-dro dhe'm gwas Job? Nyns eus denvyth kepar hag ev war an norvys, gour divlam hag ewnhynsek, ow perthi own a Dhuw hag ow treylya dhiworth drog. Ev a with y lander hwath yn fast, kynth ynnisys warnav y dhistrui heb kaws.’

⁴Ena Satnas a worthybis dhe'n ARLOEDH, ‘Kroghen rag kroghen. Pup-tra oll a'n jeves gour, ev a'n re a-barth y vewnans.

⁵Mes ystynn dha leuv lemmyn, ha toch y askorn ha'y gig, hag ev a'th villik dhe'th fas.’

⁶An ARLOEDH a leveris dhe Satnas, ‘Otta, yma ev y'th halloes, saw spar y vewnans.’

⁷Ytho Satnas eth yn-rag yn-mes a wel a'n ARLOEDH, ha plagya Job gans gwennennow kasadow dhiworth godhen y droes bys yn gwartha y benn.

⁸Hag ev a gemmeras darn a briweyth may halla omdhiruska ganso, hag ev a esedhas yn mysk an lusu.

⁹Ena y wreg a leveris dhodho, ‘A withydh hwath yn fast dha lander? Millik Duw ha marw.’

¹⁰Mes yn-medh ev dhedhi, ‘Ty a gews kepar dell gewssa onan a'n benynes foll. A wren ni degemmeres dader dhiworth leuv Duw, hag a ny wren ni degemmeres drogedh?’ Gans hemma oll ny beghas Job gans y dhiwweus.

¹¹Pan glewas tri howeth Job a-dro dhe'n drogedh oll ma re dhothya warnodho, i a dheuth pub huni dhiworth y dyller y honan, Elifaz an Temanyas, Bildad an Shuhyas ha Sofar an Naamathyas. I a settyas prys war-barth rag dos dhe geskalari ganso ha rag y gonfortya.

¹²Ha pan y'n gwelsons a-dhiworth pell, ny'n aswonnis hag i a ughelhas aga lev hag oela, hag i a skwardyas aga fows ha skattra doust war aga fenn troha nev.

¹³I a esedhas ganso war an dor seyth dydh ha seyth nos, ha denvyth ny leveris ger dhodho, rag i a welas bos y wodhevyans pur vras.