Read Kernewek Job 20 Bible Online

Job 20 - Kernewek bible

Job 20

¹Ena Sofar an Naamathyas a worthybis:

²‘Rakhenna ow prederow anes a'm gwra dhe worthybi, ha hemm yw reson my dhe fyski.

³My a glew keredh a'm arvedh, ha spyrys dres ow honvedhes a wra dhymm gorthybi.

⁴‘A ny wodhes hemma a-henys, a-ban veu den settys war an norvys,

⁵mayth yw heudh an re dhidhuw berr, hag unn pols byghan yw lowena an debelwas?

⁶Kyn ystynn y woeth bys y'n nevow, ha'y benn a dhrehedh dhe'n kommol,

⁷ev a dhe goll bys vykken kepar ha'y gawgh y honan; an dus re'n gwelas a lever, “Ple'ma ev?”

⁸Ev a nij dhe-ves kepar ha hunros, ha ny vydh kevys; ev a vydh chasyes dhe-ves kepar ha gwelesigeth nos.

⁹Ny wra an lagas a'n gwelas y weles arta, ha ny wra y dyller y aspia namoy.

¹⁰Y vebyon a hwila favour tus voghosek, ha'y dhiwleuv a dhaskorr aga golusogneth.

¹¹Y eskern yw leun a'n nerth a yowynkneth mes henna a wrowedh ganso y'n doust.

¹²‘Kynth yw drogedh hweg yn y anow, kyn y'n kudh yn-dann y daves,

¹³kyn na yll ev perthi y livra, mes ev a'n with war y stevnik,

¹⁴an boes yn y golodhyon yw treylys; venim serf yw a-berth ynno.

¹⁵Ev a lenk rychys, ha'ga hwyja arta; Duw a's estewl dhiworth y dorr.

¹⁶Ev a sugen venim serf; taves an nader a'n ladh.

¹⁷Ny mir ev orth an avonyow, an livow, an goverow a vel ha kowles.

¹⁸Ev a dhaskorr frut y ober, ha ny wra ev y lenki; ha prow y kenwerth ny wra ev tastya.

¹⁹Rag ev a arwaskas an voghosogyon ha'ga forsakya, drefenn ev dhe gemmeres dhe-ves dre nerth chi na dhrehevis ev.

²⁰‘Yn sur ny gyv ev powes a'y ewl; ny yll skapya dhiworth y yeunadow.

²¹Nyns eus travyth gesys ragdho dh'y dhybri; rakhenna ny dhur y siwena.

²²Yn leunder y balster ev a vydh stroethys; oll an nerth a anfeus a dheu warnodho.

²³Wosa ev dhe lenwel y dorr Duw a dhannvon y sorr fers warnodho, ha gul dhodho koedha warnodho avel glaw, hag ev ow tybri.

²⁴Ev a fi dhiworth arv a horn; ha seth a vrons a'n gwan.

²⁵Tennys yw hi, ha hi a dheu yn-mes a'y gorf, an bleyn ow lughesi a dheu yn-mes a'y vystel; browaghow a dheu warnodho.

²⁶Tewlder kowal yw destnys rag y dresoryow; devorys vydh gans tan nag yw gwynsellys; go-ev an pyth yw gesys yn y dylda.

²⁷An nevow a dhiskudh y gammweyth, ha'n norvys a sev er y bynn.

²⁸Kowas a-has a skub y ji dhe-ves, dowrow ow frosa yn dydh y sorr.

²⁹Homm yw rann den drog dhiworth Duw, ha'n ertach apoyntys ragdho gans Duw.’