Read Kernewek Job 22 Bible Online

Job 22 - Kernewek bible

Job 22

¹Ena Elifaz an Temanyas a worthybis:

²‘A yll gour bos dhe les dhe Dhuw? A yll den fur bos dhe les dhe Dhuw?

³Yw plesour dhe'n Ollgalloesek dha vos gwiryon, po eus prow dhodho mars yw perfydh dha fordhow?

⁴‘Yw drefenn dha own anodho y hwra ev dha geredhi, hag entra yn breus genes?

⁵A nyns yw bras dha sherewynsi, ha heb finweth dha anewnderyow?

⁶Rag ty re gemmeras arwoestlow dhiworth dha vreder heb reson, ha kibya dillas dhiworth tus, orth aga gasa noeth.

⁷Ny resys dowr dhe'n skwith rag eva, ha ty re skonyas ri bara dhe'n nownek.

⁸An gour nerthek a berghenn an tir, hag yma den enoradow trigys ynno.

⁹Ty re dhannvonas gwedhwesow dhe-ves gwag aga diwla, ha breghow omdhivasow re beu brewys.

¹⁰Rakhenna yma antylli a-dro dhis, hag own a wra dha euthega a-dhistowgh,

¹¹po tewlder ma na yllydh gweles; ha liv a dhowr a'th kudh.

¹²‘Yma Duw yn ughelder nev, hag ev a vir yn-nans war an ughella ster, mar ughel dell yns.

¹³Ty a lever, “Pandr'a woer Duw? A yll ev breusi der an tewlder down?

¹⁴Kommol tew a'n mayl ma na wel ev, hag ev ow kerdhes war gylgh an nev.”

¹⁵A vynnydh pesya war an fordh goth re drettyas gwer dhrog?

¹⁶Kibys vons kyns aga thermyn, aga selyow skubys dhe-ves gans liv.

¹⁷I a leveris dhe Dhuw, “Gas ni yn kres!” ha “Pandr'a yll an Ollgalloesek gul dhyn?”

¹⁸Byttegyns y feu ev neb a lenwis aga chiow a daklow da — mes yma kusul an dhrogoberoryon pell a-dhiworthiv.

¹⁹An re wiryon a'n gwel ha lowen yns; ha'n den ankablus a hwerth orta yn skorn.

²⁰“Distruys yw agan eskerens, Ha tan a lesk an remenant anedha.”

²¹‘Bydh akordys gans Duw hag yn kres; dre henna dader a dheu dhis.

²²Degemmer dyskans dhiworth y anow, ha gorr y eryow y'th kolonn.

²³Mar tehwelydh dhe'n Ollgalloesek ty a vydh restorys; mar kemmerydh kammhynseth dhiworth dha dylda,

²⁴ha dyghtya owr avel doust, ha'n owr a Ofir yn mysk meyn an keynres,

²⁵mars yw an Ollgalloesek dha owr ha'th arghans drudh,

²⁶ena ty a lowenha y'n Ollgalloesek, ha drehevel dha fas dhe Dhuw.

²⁷Ty a bys warnodho hag ev a'th klew, ha ty a gollenow dha ambosow.

²⁸Dha erviransow a vydh gwrys, ha golow a splann war dha fordhow.

²⁹Pan vo tus iselhes ty a lever yth yw drefenn goeth, mes Duw a saw an den uvel y dhewlagas.

³⁰Ev a dhelirv an gour ankablus,[8] ha ty a vydh delivrys dre lander dha dhiwleuv.’