Read Kernewek Job 23 Bible Online

Job 23 - Kernewek bible

Job 23

¹Ena Job a worthybis:

²‘Hedhyw ynwedh hwerow yw ow krodhvol; Poes yw y leuv yn despit a'm hanasa.

³Unnweyth a kodhven le ma'n kaffen, may hallen dos dh'y annedh!

⁴My a settsa ow hen a-dheragdho, ha lenwel ow ganow a dhadhlow.

⁵My a dhys'sa an pyth a worthybsa dhymm, ha konvedhes an pyth a lavarsa dhymm.

⁶A settsa er ow fynn gans y nerth bras? Nansi; ev a woslowsa orth an pyth a lavarav.

⁷Ena an den ewnhynsek a allsa dadhla ganso, ha akwitys vien bys vykken gans ow breusyas.

⁸‘Otta, my a dhe'n howldrehevel, mes nyns usi ev ena; ha dhe'n howlsedhes, mes ny'n kavav;

⁹A-gledh pan usi ev owth oberi ny allav y dhissernya; pan dreyl ev a-dhyghow ny'n gwelav.

¹⁰Mes ev a aswonn ow fordh vy; mara'm proffa, gylsen vy yn-mes kepar hag owr.

¹¹Ow throes re lenas fast orth y gammow; my re withas y fordh heb treylya a-denewen.

¹²Ny dhiberthis dhiworth gorhemmynnow y dhiwweus; my re dresoryas geryow y anow y'm askra.

¹³‘Mes ev a sev y honan, ha piw a yll y dreylya? ev a wra an pyth a hwans ev.

¹⁴Rag ev a gowlwra an pyth yw apoyntys ragov; hag yma lies tra a'n par na ganso.

¹⁵Rakhenna dyegrys ov a-dheragdho; pan brederav, yma own dhymm anodho.

¹⁶Duw yw neb re'm digolonnas; an Ollgalloesek re wrug euth dhymm,

¹⁷mes ny dewis yn despit dhe'n tewlder, yn despit dhe'n duder a gudh ow fas.