Read Kernewek Job 28 Bible Online

Job 28 - Kernewek bible

Job 28

¹‘Yma bal rag arghans, ha tyller may ma owr purhes.

²Horn yw kemmerys dhiworth an dor, Ha teudhys yw kober dhiworth an moen.

³Den a re diwedh dhe'n tewlder, ha hwilas moen y'n pella bounds yn duder ha tewlder down.

⁴Pell dhiworth annedhow tus ev a iger shafta, yn tylleryow ankevys gans troes den; pell dhiworth tus i a greg ha leska.

⁵An dor, may teu bara dhiworto, yw treylys a-woeles kepar ha gans tan.

⁶Saffirow a dheu dhiworth y veyn, hag yma dhodho doust a owr.

⁷‘Ny aswonn edhen-breydh vyth an hyns na, ny'n gwelas lagas falghun.

⁸Ny stankyas bestes prout warnodho; ha ny dremenas lew vyth a-ughto.

⁹‘Leuv yw settys dhe'n kellester, ha domhwel menydhyow der an gwreydh.

¹⁰Ev a dregh gwythiennow y'n karregi, ha'y dhewlagas a wel gemmow drudh a bub eghenn.

¹¹Ev a wra argeow y'n goverow ma na deverons; ha'n pyth yw kudhys ev a dhre dhe'n golow.

¹²‘Mes ple kevir furneth? Ha ple'ma tyller konvedhes?

¹³Ny gonvedh den hy thalvosogeth, ha ny yll bos kevys yn tir an re vew.

¹⁴An downder a lever, “Nyns usi ynnov”, ha'n mor a lever, “Nyns yw genev.”

¹⁵Ny yll bos prenys gans owr, ha ny yll hy fris bos poesys yn arghans.

¹⁶Ny yll bos prenys gans an owr a Ofir, gans onyks drudh na saffir.

¹⁷Nyns yw naneyl owr na gwrys hy far, na ny yll bos keschanjyes rag tegennow a owr.

¹⁸Ny vydh naneyl koral na gwrys menegys; pris furneth yw dres perlys.

¹⁹Ny yll topaz Kush bos kehevelys dhedhi; ny yll bos prenys gans owr pur.

²⁰‘Py le y teu furneth dhiworto? Ha ple'ma tyller konvedhes?

²¹Kudhys yw rag dewlagas pup-tra a vew, ha kelys rag ydhyn an ayr.

²²Abaddon hag Ankow a lever, “Gans agan diwskovarn ni re glewas son anodho.”

²³‘Duw a gonvedh an hyns dhedhi, hag ev a woer hy thyller,

²⁴rag ev a vir dhe bennow an norvys, ha gweles pup-tra yn-dann an nevow.

²⁵Pan ros ev dhe'n gwyns y boester, ha kevrenna an dowrow gans musur;

²⁶pan wrug ev ordenans rag an glaw, ha hyns rag an taran ha'n lughes;

²⁷ena ev a viras orti ha'y disklerya; ev a's fastyas ha'y hwilas.

²⁸Hag ev a leveris dhe vab-den, “Otta, own a'n Arloedh — furneth yw henna; ha skonya drog yw konvedhes.” ’