Read Kernewek Job 29 Bible Online

Job 29 - Kernewek bible

Job 29

¹Job a gemmeras y areth yn-bann arta, ow leverel:

²‘A pen vy kepar hag y'n misyow tremenys, kepar hag y'n dydhyow pan witha Duw warnav,

³pan splanna y lugarn a-ugh ow fenn, ha der y wolow y kerdhyn dre dewlder;

⁴pan en vy yn dydhyow ow yowynkneth, pan esa Duw ow kwitha[12] war ow thylda;

⁵pan esa an Ollgalloesek hwath genev, hag yth esa ow fleghes a-dro dhymm;

⁶pan o ow hammow golghys gans leth, ha'n garrek a dhevera ragov goverow a oyl!

⁷‘Pan en yn-mes dhe yet an sita, ha pareusi ow esedh y'n plen,

⁸tus yowynk a'm gweli ha kildenna, ha tus koth a sevi a'ga sav;

⁹pennsevigyon a skonya kewsel, hag a worra aga leuv war aga ganow;

¹⁰tewys o levow ugheloryon, ha'ga thaves a lena orth aga stevnik.

¹¹Pubonan a glewo ahanav a leveri ow bos gwynnvys, ha pub lagas a'm gweli a dhegi dustuni da a-dro dhymm,

¹²drefenn my dhe sawya an boghosek esa ow kria rag gweres, ha'n omdhivas na'n jevo gwereser.

¹³An dus esa ow merwel a'm benniga, ha my a wre dhe golonn an wedhwes kana.

¹⁴My a omwiska yn gwirvreus hag ev a'm gwiska; ow gwirvreus o avel pows ha tulyfant.

¹⁵Dewlagas en rag an dall, ha dewdroes rag an evredh.

¹⁶Tas rag an voghosogyon en, ha my a skoedhya ken an den na aswonnyn.

¹⁷My a derri diwen an dhrogoberer, ha gul dhodho gasa y breydh dhe goedha dhiworth y dhyns.

¹⁸Ena yn-medhav, “My a dremen y'm neyth ow honan, ha my a ynkress ow dydhyow kepar ha'n tewes;

¹⁹ow gwreydh a ystynn dhe'n dowr, ha'n gluth a wrowedh war ow skorrow dres an nos;

²⁰ow glori a vydh fresk ynnov, an warak pup-prys nowydh y'm leuv.”

²¹‘Tus a woslowi orthiv ha gortos, ow tewel rag ow husul.

²²Wosa my dhe gewsel ny gewsens namoy; ow geryow a devera warnedha.

²³I a'm gorta kepar ha glaw; igerys aga ganow kepar ha rag an glaw yn gwenton.

²⁴Pan vinhwerthyn dhedha, skant ny'n krysens, ha ny vynnsens kelli golow ow fas.

²⁵My a dhewisi an fordh ragdha ha my a esedha avel chyf, ha my a's ledya avel myghtern yn kres y lu, kepar ha den a re konfort dhe gynoryon.