Read Kernewek Job 3 Bible Online

Job 3 - Kernewek bible

Job 3

¹Wosa hemma Job a igoras y anow ha milliga dydh y dhineythyans.

²Ha Job a leveris:

³‘Res ello dhe goll an jydh hag ynno y feuv dineythys, ha'n nos a leveris, “Omdhegys yw flogh gorow.”

⁴Bedhes an jydh na tewlder; na wrello Duw y hwilas a'n ughelder, ha na splannes golow warnodho.

⁵Perghennes e tewolgow ha tewlder down. Triges kommol warnodho; gwres euth dhodho duder an jydh.

⁶An nos na — sesyes hi tewlder tew! Na lowenhes yn mysk dydhyow an vlydhen; na dhes a-berth yn niver an misyow.

⁷Devri, bedhes an nos na anvap; na vedhes garm heudh klewys ynni.

⁸Milligens hi an re a villik an jydh, neb a woer gul Leviathan dhe dhifuna.

⁹Bedhes tewel ster hy bora; gwaytyes golow heb y gavoes vyth; ha na weles kreghyn lagas an myttin,

¹⁰drefenn na dhegeas darasow torr ow mamm, na kudha trobel dhiworth ow dewlagas.

¹¹‘Prag na verwis y'n dorr, dos yn-rag dhiworth an dorr ha tremena?

¹²Prag y'm degemmeras an dhewlin, po an dhiwvronn, may hallen dena?

¹³Rag ena my a wrowedhsa ha bos kosel, my a gosksa, ena my a via yn powesva

¹⁴gans myghternedh ha konseloryon an norvys a dhastrehevis magoryow ragdha aga honan,

¹⁵po gans pennsevigyon a's tevo owr, a lenwis aga chiow a arghans.

¹⁶Po prag na veuv kudhys kepar ha flogh genys marow, kepar ha fleghigow na welsons golow?

¹⁷Ena an debeles a hedh trobla, hag ena yma an re skwith yn powesva.

¹⁸Ena yma an brisnoryon attes war-barth; ny glewons an lev a vester kethneth.

¹⁹Yma byghan ha bras ena, ha rydh yw an kethwas dhiworth y vester.

²⁰‘Prag yth yw golow res dhe'n den truan, ha bewnans dhe'n dus hwerow aga enev,

²¹hag a's tevydh hwans a vernans, mes ny dheu, ha palas ragdho moy ages rag tresoryow kudhys;

²²neb a lowenha yn feur, hag yw heudhik pan gevons an bedh?

²³Prag yth yw golow res dhe wour, kudhys y hyns, may hwrug Duw keas a-dro dhodho?

²⁴Rag ow hanasow a dheu yn le ow bara, ha diverys yw ow hynvannow kepar ha dowr.

²⁵Rag an dra a'm beus own anodho a dheu warnav, ha'n pyth a dhoutyav a dheu dhymm.

²⁶Nyns ov attes, ha nyns ov kosel; nyns eus powesva dhymm; mes trobel a dheu.’