Read Kernewek Job 31 Bible Online

Job 31 - Kernewek bible

Job 31

¹‘My re wrug kevambos gans ow dewlagas, na virsen yn unn hwansa orth gwyrghes.

²Pyth a via ow rann dhiworth Duw a-vann, ha'm ertach dhiworth an Ollgalloesek yn ughelder?

³A nyns yw anfeusi rag an dhrogoberer, terroes rag an re a wra droktra?

⁴A ny wel ev ow fordhow, ha nivera ow hammow oll?

⁵‘Mar kerdhis gans falsuri, po mar fistenas ow throes dhe doell —

⁶re biv poesys yn mantol a ewnder, hag ena Duw a woer ow bos divlam —

⁷mar treylis ow hamm a-denewen dhiworth an fordh, mars eth ow holonn war-lergh ow dewlagas, po mar lenas namm dhe'm diwleuv;

⁸ena gas my dhe hasa, ha den arall y dhybri; ha re bo ow threvas diwreydhys.

⁹‘Mar pe ow holonn dynys gans benyn, po mar skolkyen ryb daras ow hentrevek,

¹⁰ena re vallo ow gwreg rag den arall, ha re kosko gwer erell gensi.

¹¹Rag henna a via tra vethus, kammweyth dhe vos breusys;

¹²henna y fia tan ow leski bys yn Abaddon hag ev a leska ow askorr bys y'n gwreydhyow.

¹³‘Mar skonnyen gwirvreus dhe'm gwas ha'm maghteth, pan esa gansa grevons er ow fynn,

¹⁴pandr'a wrav pan wra Duw sevel yn-bann? pandr'a worthybav pan y'm hwither?

¹⁵A ny wrug ev neb a'm gwrug vy y'n dorr, aga gul i ynwedh? Hag a ny wrug an keth Duw agan formya y'n brys?

¹⁶‘Mar skonis hwansow an voghosogyon, po gul dhe dhewlagas an wedhwes fyllel,

¹⁷po dybri ow themmik ow honan, heb y gevrenna gans an omdhivas

¹⁸(mes dhiworth ow yowynkneth my a'n maga kepar dell wra tas — ha my a'n ledyas dhiworth brys y vamm);

¹⁹mar kwelis nebonan ow mos dhe goll drefenn fowt a dhillas, po den edhommek heb kudhans;

²⁰mar ny wrug y dhiwglun ow benniga, ha mar ny ve toemmhes gans knew ow deves;

²¹mar trehevis ow leuv erbynn an omdhivas, drefenn bos genev delanwes y'n lys,[14]

²²ena re goettho ow bregh dhiworth ow skoedh, ha re bo terrys orth an mell.

²³Rag yth esa euth dhymm a derroes dhiworth Duw, ha drefenn y ryelder ny yllyn gul henna.

²⁴‘Mar korris ow fydhyans yn owr, po leverel dhe owr, “Ow diogeledh os”;

²⁵mar lowenhis drefenn bos meur ow golusogneth, po drefenn ow leuv dhe waynya meur;

²⁶mar miris orth an howl ow splanna, po orth an loer ow kerdhes yn golewder,

²⁷may feu ow holonn dynys yn-dann gel, ha'm leuv a offras dhedha amm a omaj;[15]

²⁸hemma ynwedh a via kammweyth dhe vos breusys, rag my a via dislen dhe Dhuw y'n ughelder.

²⁹‘Mar lowenhis drefenn anfeus ow eskar po bos heudh pan wrug drog y gavoes

³⁰(ny ros vy kummyas dhe'm ganow dhe begha dre bysi y vewnans gans molleth);

³¹mar ny leveris tus ow thylda, ‘Piw eus na veu lenwys a'y gig?’

³²(ny ostyas estren y'n stret, mes my re igoras ow daras dhe'n tremenyas);

³³mar kelis ow hammweythresow dell wra mab-den, ow kudha ow sherewneth yn ow askra,

³⁴drefenn bos own dhymm a'n routh vras, ha bismer an teyluyow a'm euthega, may tewis ha nyns en yn-mes —

³⁵unnweyth a pe nebonan dhe'm klewes! Ottomma ow sinans! — re worthyppo dhymm an Ollgalloesek; re wrello ow kuhudhor skrifa ow kuhudhans!

³⁶Yn sur my a'n degsa war ow skoedh; my a'n kolmsa dhymm kepar ha kurun;

³⁷my a dhisklersa dhodho oll kovadh ow bewnans ha dos nes dhodho kepar ha pennsevik.

³⁸‘Mar kriis ow thir er ow fynn, ha'y fynnglow re oelas war-barth;

³⁹mar tybris y askorr heb talas, po terri spyrys y wonedhysi;

⁴⁰re teffo spern yn le gwaneth, hag ivra yn le heydh.’ Geryow Job a worfenn.