Read Kernewek Job 33 Bible Online

Job 33 - Kernewek bible

Job 33

¹‘Mes lemmyn klew ow geryow, Job, ha goslow orth pup-tra a lavarav.

²Otta, my a iger ow ganow; an taves y'm ganow a gews.

³Ow geryow a dheu dhiworth ewnhynseth ow holonn, ha'm diwweus a lever yn apert an pyth a wonn.

⁴Spyrys Duw re'm gwrug, hag anall an Ollgalloesek a re dhymm bewnans.

⁵Gorthyp dhymm, mar kyllydh; sett dha eryow a-dheragov ha sav yn-bann.

⁶Yth ov kepar ha ty a-dherag Duw; my ynwedh re beu gwrys a bri.

⁷Ny dal own ahanav dha euthega; ny wrowedh ow leuv yn poes warnas.

⁸‘Yn sur, ty re gewsis y'm diwskovarn, my re glewas son an geryow —

⁹“Pur ov, heb treuspass; glan ov, ha heb anewnder.

¹⁰Mes otta, yma dhodho arvreus er ow fynn, ev a'm reken avel eskar;

¹¹ev a worr ow dewdroes y'n stokkys, hag ev a aspi orth oll ow hynsyow.”

¹²‘My a worthyp dhis, yn hemma nyns os ewn; rag brassa yw Duw ages mab-den.

¹³Prag y strivydh er y bynn, rag ny yll denvyth gorthybi dhe oll y eryow?

¹⁴Rag Duw a gews yn unn fordh, hag ena yn arall, kyn na wra den vri a henna.

¹⁵Yn hunros, yn gwelesigeth a'n nos, pan goedh kosk down war dus, hag i ow koska yn aga gweli,

¹⁶ena ev a iger aga diwskovarn ha'ga ownekhe gans gwarnyansow,

¹⁷rag treylya den dhiworth drogober, ha'y witha rag goeth.

¹⁸Ev a saw y enev rag an pytt, ha'y vewnans rag treusi an avon.

¹⁹Po chastiys yw den dre bayn war y weli, gans strif yn y eskern pup-prys,

²⁰may hwra y vewnans kasa bara, ha'y enev a gas boes denti.

²¹Y gig yw gwastys dhe-ves ma na yll bos gwelys; ha'y eskern, a veu anweladow kyns, yw lommhes.

²²Y enev a dheu nes dhe'n pytt, ha'y vewnans dhe'n re a dhre ankow.

²³Mars eus el rybdho, medhador, onan yn mysk mil, rag disklerya dhe dhen an pyth yw ewn ragdho,

²⁴ha mars yw grassyes orto ha leverel, “Gwith e rag mos war-nans dhe'n pytt; my re gavas ronson ragdho:

²⁵ena y gig a vydh krev kepar ha kig maw; ev a dhehwel dhe dhydhyow y yowynkneth.”

²⁶‘Ena ev a bys war Dhuw ha kavoes favour ganso, ev a wel fas Duw gans lowena, ha Duw a attal dhodho y wiryonses.

²⁷Ev a gan a-rag dus ha leverel, “My re beghas ha kammdreylya an pyth a veu ewn, mes ny dhegemmeris an pyth a dhendilis.

²⁸Ev a dheliver ow enev rag mos y'n pytt, ha'm bewnans a wel an golow.”

²⁹‘Duw a wra oll an taklow ma diwweyth, teyrgweyth, gans gour,

³⁰rag dri y enev arta dhiworth an pytt, may hallo golow bewnans splanna warnodho.

³¹Gwra vri, a Job, goslow orthiv; taw ha my a gews.

³²Mar mynnydh leverel neppyth, gorthyp dhymm; kows, rag my a vynn diskwedhes dha vos ankablus.

³³Poken, goslow orthiv; Taw ha my a wra dyski furneth dhis.’