Read Kernewek Job 34 Bible Online

Job 34 - Kernewek bible

Job 34

¹Ena Elihu a leveris:

²‘Klewewgh ow geryow, hwi dus fur, ha goslowewgh orthiv, hwi dus skentel;

³rag an skovarn a brev geryow kepar dell vlas an stevnik boes.

⁴Gwren dewis an pyth yw ewn; Gwren dyski yntredhon an pyth yw da.

⁵‘Job re leveris, “Ankablus ov, mes Duw re gemmeras dhe-ves ow gwirvreus;

⁶kynth ov ewn, breusys ov avel gowek; ny yll ow goli bos yaghhes, kynth ov heb kammweyth.”

⁷Py gour yw kepar ha Job, a yv skorn kepar ha dowr?

⁸Kowethya a wra gans drogoberoryon ha kerdhes gans an debeles.

⁹Rag ev re leveris, “Ny gyv gour prow pan assay ev plegya dhe Dhuw.”

¹⁰‘Rakhenna goslowewgh orthiv, hwi wer a gonvedhes, pell bedhes dhiworth Duw ev dhe wul drog, dhiworth an Ollgalloesek ev dhe wul kamm.

¹¹Ev a attal dhe dhen an pyth re wrug, hag a surha gour dhe gavoes an pyth re dhendilas.

¹²Yn gwiryonedh ny wra Duw travyth yn trog, ha ny wra an Ollgalloesek kammdreylya gwirvreus.

¹³Piw a'n settyas war an norvys? Piw a ros dhodho charj war an bys oll?

¹⁴Mar treyllya y golonn dhodho y honan, ha kuntell dhodho y spyrys ha'y anall,

¹⁵galsa oll kig dhe goll war-barth, ha mab-den a dreylsa arta dhe dhoust.

¹⁶‘Mars eus konvedhes dhis, klew hemma; goslow orth an pyth a lavarav.

¹⁷A yll governa neb a gas gwirvreus? A vynnydh y dhampnya neb yw gwiryon ha galloesek,

¹⁸a lever dhe vyghtern, “Koeg os!” ha dhe ugheloryon, “Tebel owgh”;

¹⁹neb na dhiskwa faverans dhe bennsevigyon, ha na faver an wolusogyon moy es an voghosogyon, drefenn i oll dhe vos ober y leuv?

²⁰I a verow yn pols, yn kres an nos; shakys yw an bobel hag i dremen dhe-ves, ha kemmerys dhe-ves yw an alloesogyon heb leuv denses.

²¹‘Rag yma y dhewlagas war fordhow gour, hag ev a wel y gammow oll.

²²Nyns eus tewolgow na tewlder down may hallo drogoberoryon omgudha.

²³Ny worras Duw termyn apoyntys rag gour, dhe vos a-dheragdho rag breus.

²⁴Ev a vrew an alloesogyon heb hwithrans, hag a sett re erell yn-bann yn aga le.

²⁵Drefenn ev dhe aswonn aga oberow, ev a's domhwel y'n nos, ha skwattys yns.

²⁶Ev a's gwysk drefenn aga drogober yn tyller may hyll tus y weles,

²⁷drefenn i dhe dreylya dhiworth y siwya, ha ny wrussons vri a'y fordhow.

²⁸I a wrug dhe gri an voghosogyon dos dhodho, may klewas ev kri an dus truan.

²⁹‘Mes pan yw ev tawesek, piw a'n dampen? Pan gudh ev y fas, piw a'n aspi? Mes yma ev a-ugh kenedhel hag a-ugh denses,

³⁰dhe lettya den ansans rag governa, rag settya antylli rag an bobel.

³¹‘Mar leverir dhe Dhuw, “My re borthas kessydhyans; ny dreuspassav moy;

³²dysk dhymm an pyth na welav; mar kammwrug vy, ny'n gwrav namoy.”

³³A wra ev dha attyli yn maner wiw dhis, ha ty orth y skonya? Res yw dhiso jy ervira, a-der my; rakhenna diskler an pyth a wodhes.

³⁴Gwer a gonvedhes a lever dhymm, ha gour fur neb a glew a lever dhymm,

³⁵“Job a gews heb godhvos, ha heb furneth yw y eryow.”

³⁶Unnweyth a pe Job prevys bys y'n gorfenn, rag ev dhe worthybi kepar ha gwer dhrog.

³⁷Ev a geworr rebellyans dh'y begh; ev a dak diwleuv yn agan mysk, ha lieshe y eryow erbynn Duw.’