Read Kernewek Job 37 Bible Online

Job 37 - Kernewek bible

Job 37

¹‘Drefenn hemma ynwedh ow holonn a gren, ha lemmel dhiworth hy le.

²Goslowewgh orth taran lev Duw hag orth an grommyans a dheu dhiworth y anow.

³Ev a liver y daran yn-dann an nev oll, ha'y lughes dhe sornow an norvys.

⁴Wosa henna y lev a vedhygel; ev a darenn gans lev meuredhek ha ny lett ev an lughes kettell vo y lev klewys.

⁵Duw a darenn yn fordhow marthys; ev a wra taklow bras dres agan konvedhes.

⁶Rag dhe'n ergh ev a lever, “Koedh war an dor”; ha dhe gowas a law, “Bydh krev”.

⁷Ev a lett pub den oll rag oberi, mayth aswonno oll tus y ober.

⁸An bestes a omgudh ha gortos yn aga fowys.

⁹An korwyns a dheu dhiworth y jambour, ha yeynder dhiworth an gogledh.

¹⁰Gans anall Duw yey yw formys, ha'n dowrow ledan yw rewys kales.

¹¹Ev a garg an kommol a lybor; an kommol a skatter y lughes.

¹²I a dreyl a-dro dre y gevarwoedhyans, i a wra an pyth yw gorhemmynnys ganso war enep an bys oll.

¹³Po rag kessydhyans, po rag y dir po rag tregeredh, ev a wra dhedha dos.

¹⁴‘Klew hemma, A Job; sav kosel, ha preder a-dro dhe oberow marthys Duw.

¹⁵A wodhes fatell worhemmynn Duw an kommol, ha gul dhe lughes y gommol splanna?

¹⁶A wodhes fatell neuvell an kommol, oberow marthys anodho ev neb yw perfydh y wodhvos,

¹⁷ty hag yw toemm y'th tillas pan yw tesek an bys yn-dann gwyns an dyghow?

¹⁸A yllydh, kepar hag ev, ystynn an nevow, mar grev avel mirour teudhys?

¹⁹‘Dysk dhyn an pyth a wren ni leverel dhodho; ny yllyn restra agan ken drefenn an tewlder.

²⁰A dhegoedh bos leverys dhe Dhuw y mynnav kewsel? Eus gour a byssa dhe vos kollenkys?

²¹Ha lemmyn ny yll tus mires orth an golow pan usi ow splanna y'n nevow, wosa an gwyns dhe dremena ha'ga glanhe.

²²Dhiworth an gogledh y teu splannder owrek; war Dhuw yma meuredh euthyk.

²³An Ollgalloesek — ny yllyn y gavoes; meur yw y nerth, ha'y vreus, hag yn y wirvreus ha'y wiryonedh bras ny arwask ev.

²⁴Rakhenna tus a berth own anodho; ha ny wra vri a'n dus yw fur yn tybyans aga holonn aga honan.’