Read Kernewek Job 38 Bible Online

Job 38 - Kernewek bible

Job 38

¹Ena an ARLOEDH a worthybis dhe Job dhiworth an korwyns:

²‘Piw yw hag a dewlha ow husul gans geryow heb godhvos?

³Grogys dha dhiwglun kepar ha gour; my a wovynn orthis ha ty a lever dhymm.

⁴‘Ple'th eses pan settis vy sel an norvys? Lavar dhymm, mars eus konvedhes dhis.

⁵Piw a erviras y vraster? Ty a woer, yn sur! Piw a ystynnas kordenn-vusura warnodho?

⁶Pyth esa y selyow sedhys warnodho? po piw a dhesedhas y bennmen —

⁷ha ster an myttin ow kana war-barth hag oll mebyon Duw ow karma gans lowena?

⁸‘Piw a dhegeas an mor a-dryv darasow pan dardhas ev dhiworth an dorr? —

⁹pan wrug vy dhe gommol bos y dhillas, ha'y vaylya yn tewlder tew,

¹⁰ha ragsettya finwethow ragdho, ha gorra barrys ha darasow,

¹¹pan leveris vy, “Ty a yll dos bys omma mes na fella, ha dha vordonnow goethus a vydh lettys omma”?

¹²‘A resys gorhemmynnow dhe'n myttin yn oll dha vewnans, po diskwedhes dhe'n bora y dyller,

¹³may hallo ev synsi an norvys der y emlow, ha shakya an dhrogoberoryon a-dhiworto?

¹⁴Chanjys yw kepar ha pri yn-dann sel, ha liwys yw kepar ha dillas.

¹⁵Skonys yw an golow dhiworth an dhrogoberoryon, ha terrys yw aga bregh dhrehevys.

¹⁶‘A entersys bys yn fentynyow an mor, po kerdhes yn downder an mor?

¹⁷A veu porthow ankow diskwedhys dhis? A welsys porthow an tewlder down?

¹⁸A gonvedhsys ledander an norvys? Lavar dhymm mar kodhes oll hemma.

¹⁹‘Ple'ma'n fordh dhe drigva an golow? Ha ple'ma tyller an tewlder?

²⁰A yllydh aga gorra yn aga oryon? A aswonnydh an hynsyow dh'aga chiow?

²¹Ty a woer, drefenn dha vos genys ena, ha bras yw niver dha dhydhyow!

²²‘A entersys yn gwithvaow an ergh, po gweles gwithvaow an keser

²³a withis vy rag termyn trobel, rag dydhyow a vatel ha bresel?

²⁴Ple'ma'n fordh dhe'n tyller mayth yw golow lesrynnys, po le mayth yw gwyns an howldrevel keskerys war an norvys?

²⁵‘Piw re droghas kanel rag livow an glaw, ha hyns rag an taran ha'n lughes,

²⁶rag dri glaw dhe dir ma nag eus trigys gour vyth, dhe dhifeythtir ma nag eus den,

²⁷rag dowrhe difeyth ynyal, ha gul dhe'n tir dyllo gwels?

²⁸‘Eus tas dhe'n glaw? Piw a dhineythis an bannaghow a luth?

²⁹Dhiworth torr piw y teuth an yey yn-mes? Piw a dhineythis an rew dhiworth an nevow

³⁰a wra dhe'n dowrow bos mar gales avel men, ha rewi enep an downvor?

³¹‘A yllydh kelmi kadonyow an Pleyades? A yllydh lowsya kadonyow Orion?

³²A yllydh dri yn-mes arwoedhyow an stergylgh yn aga sesonyow po a yllydh ledya an Ors gans y gelyn?

³³A wodhes ordenansow nev? A yllydh settya aga rewl war an norvys?

³⁴‘A yllydh drehevel dha lev dhe'n kommol, ma'th kuttho liv a dhowrow?

³⁵A yllydh dyllo tardhow lughes, mayth ellons ha leverel dhis, “Yth eson omma”?

³⁶Piw a worras furneth y'n kommol,[18] po piw a ros konvedhes dhe'n niwl?[19]

³⁷Piw a'n jeves an furneth rag nivera an kommolennow, po piw a yll domhweles sethow dowr an nevow,

³⁸pan yw an doust kaleshes avel alkan teudhys, ha'n gweres a len war-barth yn pellennow?

³⁹‘A yllydh helghya preydh rag an lowarn, ha gwalgha ewl an lewyon yowynk,

⁴⁰hag i ow plattya yn aga fow, po kontrewaytya yn prysk?

⁴¹Piw a bareus an preydh rag an vran-vras, pan gri hy fleghes orth Duw, ha gwandra a-dro drefenn fowt a voes?