Read Kernewek Job 39 Bible Online

Job 39 - Kernewek bible

Job 39

¹‘A wodhes p'eur tineyth gever an karregi? A welydh an ewigow ow tineythi?

²A yllydh nivera an misyow may tegons aga helyn hag a wodhes an termyn may tineythons?

³I a blatt ha dyllo aga askorr ha delivra aga fleghes.

⁴Aga fleghes a ha bos krev y'n powdir; i a dhiberth ha ny dhehwelons dhedha.

⁵‘Piw a asas dhe'n oneger mos dhe wari? Piw a dhigolmas lovonow an asen gwyls?

⁶My a ros dhodho an difeythtir rag y drigva, ha'n hoelanek rag y annedh.

⁷Ev a hwerth orth habadoellya an sita; ny glew ev kri an lewyer.

⁸Ev a wander y'n menydhyow avel y beurva, ha hwilas glasneth oll.

⁹‘A vynn an ojyon gwyls dha servya? A wra ev gortos ryb dha bresep nosweyth?

¹⁰A yllydh y synsi dhe'n fynngel gans herness? A wra ev kloesya an nansow war dha lergh?

¹¹A yllydh fydhya ynno drefenn y grevder, ha gasa dhodho dha lavur poes?

¹²A yllydh fydhya ynno dhe dhehweles ha dri an greun dhe'th leur-drushya?

¹³‘Eskelli an strus a flapp yn lowen, mes ny nij strus mar dha avel hwibon.

¹⁴Hi a as hy oyow war an dor, ha'ga gasa dhe doemmhe y'n tewes,

¹⁵owth ankevi y hallo troes aga brewi, y hallo best gwyls stankya warnedha.

¹⁶Hi a dhyght hy fleghes yn fell, kepar dell nag esons dhedhi; nyns yw a vern dhedhi bos euver hy lavur;

¹⁷rag Duw a wrug dhedhi ankevi furneth, ha ny ros dhedhi kevrenn yn konvedhes.

¹⁸Mes pan omsav hi rag poenya, hi a hwerth orth margh ha marghek.

¹⁹‘A resys dhe'n margh y grevder? po gwiska y gonna gans mong?

²⁰A wredh dhodho lamma kepar ha lokust? Son y renki hwoethus yw euthyk.

²¹Ev a baw war gamm ha lowenhe yn y grevder; ha mos yn-rag erbynn arvow an vatel.

²²Ev a hwerth orth own, heb bos digolonnek; ny gildenn ev dhiworth an kledha.

²³An woen-sethow a gryghyll er bynn y denewen, an guw ha'n lons a lughes.

²⁴Ev a lenk an dor gans fellder ha sorr; ny yll ev sevel stag pan sen an korn.

²⁵Pan sen an korn ev a renk “Aha!” Ev a vlas an vatel dhiworth pell, taran an hembrenkysi ha garm an gas.

²⁶‘Yw dha skians ji hag a wra an hok dhe nija, hag ystynn y eskelli troha'n dyghow?

²⁷Yw dha worhemmynn ji a wra an er dhe nija ughel y'n ebron, ha drehevel y neyth yn tyller ughel?

²⁸Yma trigys war garrek hag ev a annedh ena, kleger karnedhek yw y skons.

²⁹A-dhiworto ev a aspi y breydh; Y dhewlagas a'n gwel dhiworth pell.

³⁰Y fleghes a sugen goes; hag yma ev y'n tyller may ma tus varow.’