Read Kernewek Salmow 1 Bible Online

Salmow 1 - Kernewek bible

Salmow 1

¹Gwynnvys an gour na gerdh yn kusul an debeles, ha na sev yn fordh peghadoryon, ha na esedh yn esedhva an re a wra ges;

²mes yma y dhelit yn lagha an ARLOEDH, hag yn y lagha y preder ev dydh ha nos.

³Ev a vydh avel gwydhenn plynsys ryb goverow dowr, ow ri hy frut yn hy seson, ha ny wedher hy del. Hag yn pup-tra a wra ev a siwen.

⁴Nyns yw yndellma an debeles, mes yth yns i avel kulyn a wra an gwyns y hwytha dhe-ves.

⁵Rakhenna, ny sev an debeles y'n vreus, na peghadoryon yn kuntelles an re wiryon;

⁶rag an ARLOEDH a aswonn fordh an re wiryon, mes fordh an debeles a dhe goll.