Read Kernewek Salmow 10 Bible Online

Salmow 10 - Kernewek bible

Salmow 10

¹Prag, A ARLOEDH, y sevydh a-bell? Prag yth omgelydh yn prysyow anken?

²An tebelwas yn y woeth a helgh an boghosek; bedhens i kechys gans an towlow a wrussons.

³Rag an tebelwas a vost a vynnas y enev, ev a vennik an den yw kraf rag gwayn, ha dispresya an ARLOEDH.

⁴An tebelwas yn y valghder ny'n hwila; oll y dybyansow yw, ‘Nyns eus Duw.’

⁵Y fordhow a siwen pup-prys; yma dha vreusow a-vann, yn-mes a'y wel; ev a hwyth orth y eskerens oll.

⁶Ev re leveris yn y golonn, ‘Ny drebuchyav; a unn henedh dhe'n nessa ny vydhav yn anken.’

⁷Y anow yw leun a vollethi ha falsuri hag arwask; yn-dann y daves yma dregynn hag anewnder.

⁸Ev a esedh ow kontrewaytya y'n trevow; y'n kudhvaow ev a ladh an den divlam. Y dhewlagas a aspi an anfeusik yn-dann gel.

⁹Ev a gontrewayt y'n gudhva avel lew yn fow; ev a gontrewayt rag may talghenno an boghosek, ev a dhalghenn an boghosek orth y denna yn y roes.

¹⁰Ev a blatt, ev a bleg dhe'n dor, ha'n anfeusik a goedh yn y alloes.

¹¹Ev a leveris yn y golonn, ‘Duw re ankovas, ev a gudh y fas, ha ny wel nevra.’

¹²Sav, A ARLOEDH; A Dhuw, drehav dha leuv; na ankov an voghosogyon.

¹³Prag y hwra an tebelwas dispresya Duw, ow leverel yn y golonn, ‘Ny wra ev attendya’?

¹⁴Ty re'n gwelas, rag ty a wra vri a dhregynn ha poenvos, dh'y gemmeres y'th tiwleuv; an anfeusik a gemmynn y honan dhiso jy; ty yw gwereser an omdhivas.

¹⁵Torr bregh an tebelwas ha'n drogoberer; hwither y sherewneth ma na vo kevys namoy.

¹⁶An ARLOEDH yw Myghtern bys vykken ha bynnari; an kenedhlow res eth dhe goll yn-mes a'y dir ev.

¹⁷ARLOEDH, ty re glewas desir an re uvel; ty a gennerth aga holonn, ty a wra dhe'th skovarn goslowes,

¹⁸dhe ri gwirvreus dhe'n omdhivas ha'n den arweskys, ma na wrello den a'n nor gorra own namoy.