Read Kernewek Salmow 102 Bible Online

Salmow 102 - Kernewek bible

Salmow 102

¹Pysadow a dhen grevys, pan glamder, ow tiveri y grodhvol a-dherag an ARLOEDH. A ARLOEDH, klew ow fysadow; ha re dheffo ow kri dhiso jy.

²Na gudh dha fas ragov yn dydh ow anken. Pleg dha skovarn dhymm; y'n jydh may halwav, fisten dhe worthybi dhymm.

³Rag ow dydhyow a dremen avel mog, ha'm eskern yw leskys avel yttew.

⁴Gweskys yw ow holonn ha gwedhrys avel gwels; mayth ankovav dybri ow bara.

⁵Drefenn lev ow hynvann ow eskern re lenas orth ow hig.

⁶My yw haval dhe belikan[19] y'n gwylvos, my yw avel oula y'n tylleryow difeyth.

⁷My re woelyas, hag avel golvan yth ov vy y honan war do an chi.

⁸Ow eskerens a'm skorn oll an jydh; an re yw konneryek er ow fynn a'm molleth.

⁹Rag my re dhybris lusu avel bara, ha kemmyska ow diwes gans oelva,

¹⁰drefenn dha sorr ha'th koler; rag ty re'm drehevis ha'm tewlel dhe-ves.

¹¹Ow dydhyow a leha kepar ha skeus, ha kepar ha gwels y hwedhrav.

¹²Mes ty, A ARLOEDH, a dhur bys vykken, ha'th kovadh a unn henedh dhe'n nessa.

¹³Ty a sev ha kemmeres truedh a Sion, rag prys yw bos grassyes orti; an prys apoyntys re dheuth.

¹⁴Rag dha wesyon a gemmer plesour yn hy meyn, hag a gemmer truedh a'y doust.

¹⁵Ytho an kenedhlow a berth own a hanow an ARLOEDH, hag oll myghternedh an nor a'th wolewder.

¹⁶Pan dhrehav an ARLOEDH Sion, y hwelir ev yn y wolewder.

¹⁷Ev a wra vri a bysadow an den noeth, ha ny dhispres aga fysadow.

¹⁸Hemma a vydh skrifys rag an henedh a dheu, ha pobel a vydh formys a wormel an ARLOEDH;

¹⁹rag ev re viras war-woeles dhiworth ughelder y sentri, dhiworth nev y hwelas an ARLOEDH an nor,

²⁰dhe glewes kynvann an prisner, dhe dhelivra an re dampnys dhe'n mernans;

²¹dhe dherivas hanow an ARLOEDH yn Sion, ha'y wormola yn Yerusalem,

²²pan yw an poblow omguntellys war-barth, ha'n gwlaskordhow, dhe servya an ARLOEDH.

²³Ev a wannhas ow nerth war an hyns; ev a verrhas ow dydhyow.

²⁴My a leveris, ‘Ow Duw, na dhog vy yn-mes yn mysk ow dydhyow; dha vlydhynyow a dhur a unn henedh dhe'n nessa.’

²⁵Wostalleth y selsys an nor, ha'n nevow yw ober dha dhiwleuv.

²⁶I a dhe goll, mes ty a sev; i a gothha avel kweth. Avel dillas ty a's treyl hag i a dremen;

²⁷mes ty yw an keth, ha ny fyll dha vlydhynyow.

²⁸Fleghes dha wesyon a dhur; ha'ga has a vydh fastys y'th wolok.