Read Kernewek Salmow 109 Bible Online

Salmow 109 - Kernewek bible

Salmow 109

¹Dhe vester an keur. Salm a Davydh. Na daw, A Dhuw ow gologhas,

²rag ganow an tebelwas ha'n ganow a falsuri yw igor er ow fynn; i re gewsis er ow fynn gans fals taves;

³i a omsettyas a-dro dhymm ynwedh gans geryow kas, hag omladh er ow fynn heb ken.

⁴Yn attal a'm kerensa i a sev er ow fynn, mes my a omre dhe bysadow.

⁵I re dylis dhymm dregynn rag da, ha kas rag kerensa.

⁶Gorr tebelwas dhe vos router warnodho, ha seves kuhudhor orth y leuv dhyghow.

⁷Pan y'n breusir, des ev yn-mes kablus, ha bedhes y bysadow treylys dhe begh.

⁸Bedhes y dhydhyow boghes, ha kemmeres ken onan y soedh.

⁹Bedhes y fleghes omdhivasow, ha'y wreg gwedhwes.

¹⁰Bedhes y fleghes gwandrysi ha beggyers; hwilens i alusen ynwedh pell dhiworth aga annedhow shyndys.

¹¹Dalghennes an okerer pup-tra eus ganso, ha pylles estrenyon askorr y lavur.

¹²Na vedhes neb a ystynno tregeredh dhodho, ha na vedhes neb a gemmerro truedh a'y fleghes omdhivas.

¹³Bedhes y linyeth diwreydhys, ha bedhes y hanow defendys dhe-ves y'n henedh a siw.

¹⁴Bedhes kovadh kammweyth y dasow a-dherag an ARLOEDH, ha na vedhes pegh y vamm defendys dhe-ves.

¹⁵Bedhens i prest a-dherag an ARLOEDH, rag may torro dhe-ves aga hovadh dhiworth an norvys;

¹⁶Drefenn na borthas kov a wul tregeredh, mes ev a helghyas an den truan ha'n boghosek rag may lattha an re trogh aga holonn.

¹⁷Ev a garas molleth, ha hi a dheu dhodho; ny vynnas bennath, ha pell yw hi dhiworto.

¹⁸Ev a omwiskas gans molleth kepar ha gans kweth; sygeres hi yn y golodhyon avel dowr, hag avel oyl yn y eskern.

¹⁹Bedhes hi kepar ha'n gwisk mayth omwisk ynno, ha kepar ha'n grogys a wisk a-dro dhodho pup-prys.

²⁰Hemm yw gober ow huhudhoryon dhiworth an ARLOEDH, ha'n re a gews erbynn ow enev.

²¹Mes gwra dhymm, A ARLOEDH Duw, herwydh dha hanow; drefenn bos dha dregeredh da, gwra ow delivra.

²²Rag truan ha boghosek ov vy, ha'm kolonn yw goliys a-bervedh ynnov.

²³Yth av dhe-ves avel skeus pan hirha; y'm skubir dhe-ves avel an lokust.

²⁴Ow dewlin a wannha gans penys, ha'm kig a fyll a fowt blonek.

²⁵My a dheuth ha bos skorn dhedha; pan y'm gwelsons, i a shakyas aga fenn.

²⁶Gweres dhymm, A ARLOEDH ow Duw; salw vy herwydh dha dregeredh;

²⁷may hwodhvons bos hemma dha leuv jy, hag y feu ty, A ARLOEDH, a'n gwrug.

²⁸Mollethens i, mes ty bennik; pan sevons, perthens i meth; mes lowenhes dha was.

²⁹Bedhes ow huhudhoryon gwiskys yn disenor, ha gwiskens i aga meth avel mantell.

³⁰My a ras dhe'n ARLOEDH yn feur gans ow ganow, ha my a'n gormel yn mysk an routh.

³¹Rag ev a sev orth leuv dhyghow an boghosek, dh'y selwel a'n re a helgh y enev.