Read Kernewek Salmow 115 Bible Online

Salmow 115 - Kernewek bible

Salmow 115

¹Na ro dhyn ni, A ARLOEDH, na ro dhyn ni an gordhyans, mes dhe'th hanow jy, a-barth dha dregeredh ha'th wiryonedh.

²Prag y lever an kenedhlow ‘Ple'ma aga Duw?’

³Mes agan Duw, yma ev y'n nevow; ev re wrug kekemmys a vynnas.

⁴Aga imajys yw arghans hag owr, ober diwleuv den.

⁵Ganow a's teves, mes ny gewsons; dewlagas a's teves, mes ny welons.

⁶Diwskovarn a's teves, mes ny glewons; dewfrik a's teves, mes ny vlasons.

⁷Diwleuv a's teves, mes ny davons; treys a's teves mes ny gerdhons; ny gewsons der aga bryansenn

⁸An re a's gwra yw kehaval dhedha; hag ynwedh oll an re a drest ynna.

⁹A Ysrael, trest y'n ARLOEDH; ev yw aga gweres ha'ga skoes.

¹⁰A ji Aron, trest y'n ARLOEDH; ev yw aga gweres ha'ga skoes.

¹¹Hwi a berth own a'n ARLOEDH, trestyewgh y'n ARLOEDH; ev yw aga gweres ha'ga skoes.

¹²An ARLOEDH re borthas kov ahanan, hag ev a'gan bennik; ev a vennik chi Ysrael, ev a vennik chi Aron.

¹³Ev a vennik an re a berth own a'n ARLOEDH, kekeffrys byghan ha bras.

¹⁴An ARLOEDH a'gas moghha moy ha moy, hwi ha'gas fleghes.

¹⁵An re bennigys a'n ARLOEDH owgh hwi, formyer nev ha nor.

¹⁶An nevow yw nevow an ARLOEDH, mes an nor re ros ev dhe vebyon den.

¹⁷Ny wormel an re varow an ARLOEDH, naneyl oll an re a dhiyskynn dhe daw.

¹⁸Mes ni a vennik an ARLOEDH alemma rag ha bys vykken. Gormelewgh an ARLOEDH.