Read Kernewek Salmow 116 Bible Online

Salmow 116 - Kernewek bible

Salmow 116

¹My a gar an ARLOEDH, rag ev re glewas lev ow govynnadow.

²Drefenn ev dhe blegya y skovarn dhymm, rakhenna my a elow warnodho hedre vewiv.

³Kerdyn ankow res eth a-dro dhymm; ha galarow ifarn a'm dalghennas; My a gavas anken hag ahwer.

⁴Ena my a elwis war hanow an ARLOEDH: ‘A ARLOEDH, my a'th pys, delirv ow enev.’

⁵Grassyes yw an ARLOEDH, ha gwiryon; devri truedhek yw agan Duw.

⁶An ARLOEDH a with an re sempel; my a veu dres dhe iselder, hag ev a'm selwis.

⁷Dehwel dhe'th powesva, ow enev, rag an ARLOEDH re beu da orthis.

⁸Rag ty re dhelivras ow enev dhiworth ankow, ow dewlagas dhiworth dagrow, ha'm treys dhiworth koedha.

⁹My a gerdh a-dherag an ARLOEDH yn tir an re vew.

¹⁰My a grysis, hwath pan gewsis ‘Iselhes en vy yn feur.’

¹¹My a leveris yn ow fysk, ‘Tus oll yw gowleverysi.’

¹²Py gober a rov dhe'n ARLOEDH rag oll y helder dhymm?

¹³My a dhegemmer hanaf selwyans ha gelwel war hanow an ARLOEDH.

¹⁴My a dal ow ambosow dhe'n ARLOEDH lemmyn a-dherag oll y bobel.

¹⁵Drudh yn golok an ARLOEDH yw mernans y syns.

¹⁶Yn hwir, A ARLOEDH, dha was ov vy, dha was ov vy, ha mab dha vaghteth. Ty re dorras ow holmennow.

¹⁷My a offrynn dhis sakrifis a rasyans ha gelwel war hanow an ARLOEDH.

¹⁸My a dal ow ambosow dhe'n ARLOEDH lemmyn a-dherag oll y bobel,

¹⁹yn klosyow chi an ARLOEDH, a-bervedh ynnos, A Yerusalem. Gormelewgh an ARLOEDH.