Read Kernewek Salmow 139 Bible Online

Salmow 139 - Kernewek bible

Salmow 139

¹Dhe vester an keur. Salm a Davydh. A ARLOEDH, ty re'm hwithras ha'm aswonn.

²Ty a aswonn ow esedha ha'm sevel; ty a gonvedh ow frederow a bellder.

³Ty a hwither ow hyns ha'm growedha, ha ty a aswonn oll ow fordhow.

⁴Rag nyns eus ger war ow thaves heb ty, A ARLOEDH, dh'y wodhvos yn tien.

⁵Ty re'm degeas a-dryv hag a-rag, ha gorra dha leuv warnav.

⁶Re varthys ragov yw an skians na; re ughel yw, ny wonn drehedhes dhodho.

⁷Ple'th av dhiworth dha Spyrys, ha ple fiav dhiworth dha fas?

⁸Mars yskynnen dhe nev y fiesta ena; mar tarbarren ow gweli yn ifarn ottajy ena ynwedh.

⁹Mar kemmerren eskelli an jydh-tardh ha triga yn penn pella an mor;

¹⁰Ena ynwedh dha leuv a'm hembronksa, ha'th leuv dhyghow a'm synssa.

¹¹Mar lavarav, ‘Yn hwir, an tewolgow a'm kudh, ha'n golow a vydh nos dhymm’,

¹²nyns yw tewolgow tewl genes jy, mes an nos a splann avel an jydh; kehaval yw an tewolgow ha'n golow genes jy.

¹³Rag ty a formyas ow lonethi; ty a'm gwias war-barth yn brys ow mamm.

¹⁴My a'th wormel, rag euthyk ha marthys y feuv gwrys. Marthys yw dha oberow, ha'm enev a woer hemma yn ta.

¹⁵Nyns o ow eskern kudhys ragos, pan en vy formys yn-dann gel, gwiys yn konnyk yn rannow isella an nor.

¹⁶Dha dhewlagas a welas ow devnydh kyns ow bos genys, hag y'th lyver jy oll ow eseli a veu skrifys; Oll ow dydhyow a veu niverys pan na veu hwath onan anedha.

¹⁷Ass yw drudh dhymm dha brederow, A Dhuw, ass yw meur aga sommenn!

¹⁸Mara's niverren, y fiens moy es an tewes; mar teffen dh'aga gorfenn, hwath y fien vy genes.

¹⁹Unnweyth mar kwrelles ladha an tebelwas, A Dhuw; omdennewgh dhiworthiv ytho, hwi dus woesek.

²⁰I a gews er dha bynn yn spitus, ha'th eskerens a sev er dha bynn yn euver.

²¹A ny's kasav, A ARLOEDH, neb a'th kas jy? A ny'm beus keudh drefenn an re a sev er dha bynn?

²²My a's kas gans kas kowal; my a's syns yn eskerens.

²³Hwither vy, A Dhuw, ha godhvydh ow holonn; prov vy, ha godhvydh ow frederow;

²⁴ha gwel mars eus fordh a sherewneth ynnov, ha hembronk vy y'n fordh nevra a bes.