Read Kernewek Salmow 141 Bible Online

Salmow 141 - Kernewek bible

Salmow 141

¹Salm a Davydh. ARLOEDH, my a elow warnas, fisten dhymm; klew ow lev pan alwav warnas.

²Re bo ow fysadow a-dheragos avel ynkys, ha'm diwleuv drehevys avel offrynn gwesper.

³Gorr gwithyas, A ARLOEDH, a-rag ow ganow, gwith daras ow diwweus.

⁴Na bleg ow holonn dhe dravyth dhrog, dhe wul drogoberow gans gwer a wra sherewneth; na as vy dhe dastya aga boesow sawrek.

⁵Mes gwres den gwiryon ow gweskel — kuvder yw; gwres ev ow rebukya: yth yw oyl war ow fenn; ny wra ow fenn y nagha. Mes ow fysadow a vydh prest erbynn aga drogoberow.

⁶Aga breusysi a vydh tewlys dhe'n dor ryb an garrek, hag i a glew ow lavarow, rag hweg yns.

⁷Kepar ha den owth aras hag ow kloesya war an tir, yn kettella y fydh aga eskern skattrys orth ganow ifarn.

⁸Mes ow dewlagas a vir orthis, A ARLOEDH Duw; ynnos jy y hwilav skovva, na as vy dhe vos omdhivas.

⁹Gwith vy rag an vaglenn re worrsons er ow fynn, ha rag antylli an dhrogoberoryon.

¹⁰Koedhes an debeles yn aga roesow aga honan, ha my ow tremena yn saw.