Read Kernewek Salmow 143 Bible Online

Salmow 143 - Kernewek bible

Salmow 143

¹Salm a Davydh. Klew ow fysadow, A ARLOEDH, ro skovarn dhe'm govynnadow; gorthyp dhymm a-barth dha lelder ha'th ewnder.

²Na dhoro dha was dhe vreus, rag y'th wolok jy ny vydh denvyth yn few prevys gwiryon.

³Rag an eskar re helghyas ow enev; ev re skwattyas ow bewnans dhe'n leur, ev re wrug dhymm triga yn tewlder, kepar ha'n re yw marow seuladhydh.

⁴Rakhenna ow spyrys a glamderas ynnov, ha'm kolonn a-bervedh ynnov a goedhas yn desper.

⁵My a berth kov a'n dydhyow koth; my a breder a'th wriansow oll, my a breder a oberow dha dhiwleuv.

⁶My a ystynn ow diwleuv dhiso; ow enev a yeun war dha lergh kepar ha tiredh sygh. Sela.

⁷Fisten dhe worthybi dhymm, A ARLOEDH, rag ow spyrys a fyll. Na gudh dha fas ragov, ma na viv kepar ha'n re a dhiyskynn dhe'n pytt.

⁸Gwra dhymm klewes dha dregeredh myttinweyth, rag ynnos jy y trestyav. Gwra dhymm godhvos an fordh y koedh dhymm kerdhes ynni, rag dhiso jy y trehavav ow enev.

⁹Gwra ow delivra, A ARLOEDH, dhiworth ow eskerens; dhiso jy y fiav rag skovva.

¹⁰Dysk dhymm gul dha vodh, rag ty yw ow Duw. Gwres dha Spyrys kuv ow hembronk yn tir kompes.

¹¹Bywha vy, A ARLOEDH, a-barth dha hanow; a-barth dha ewnder doroy ow enev yn-mes a anken.

¹²Y'th tregeredh diswra ow eskerens, ha distru oll an re a omladh erbynn ow enev; rag dha was ov vy.