Read Kernewek Salmow 144 Bible Online

Salmow 144 - Kernewek bible

Salmow 144

¹Salm a Davydh. Bennigys re bo an ARLOEDH ow harrek, neb a dhysk dhe'm diwleuv gwerrya, ha dhe'm bysies omladh;

²ow skons ha'm dinas, ow thour ha'm delivrer, ow skoes may trestyav ynno, neb a feth an poblow yn-dannov.

³ARLOEDH, pyth yw den may hwrylli y aswonn, po mab-den may hwrylli vri anodho?

⁴Kepar hag anall yw den yw; y dhydhyow a dremen avel skeus.

⁵Gwra dhe'th nevow plegya dhe'n dor, A ARLOEDH, ha diyskynn; toch an menydhyow, ha megi a wrons.

⁶Dyllo dha lughes, ha'ga skattra; tenn dha sethow, ha'ga domhwel.

⁷Ystynn dha leuv a'n ughelder; gwra ow delivra, ha kemmer vy yn-mes a dhowrow meur, yn-mes a leuv estrenyon.

⁸Aga ganow a lever euveredh, ha'ga leuv dhyghow yw leuv dhyghow a falsuri.

⁹My a gan kan nowydh dhis, A Dhuw; war delynn a dheg kordenn y kanav gormola dhis.

¹⁰Ty re ros budhogoleth dhe vyghternedh, ha delivra Davydh dha was.

¹¹Saw vy a beryll an kledha, ha gwra ow delivra dhiworth leuv estrenyon; aga ganow a lever euveredh, ha'ga leuv dhyghow yw leuv dhyghow a falsuri.

¹²Re deffo agan mebyon avel plansow yn aga yowynkneth, ha'gan myrghes avel pennmeyn kervys kepar hag yn palas.

¹³Re bo agan skiberyow leun, ow ri boes a bub eghenn; ha re dhineyttho agan deves milyow ha degow a vilyow yn agan gwelyow.

¹⁴Re bo agan oghen krev rag ober, heb omsettyansow, ha heb divroa, ha heb kri a gynvann yn agan stretys.

¹⁵Gwynnvys an bobel yn studh a'n par na; devri, gwynnvys an bobel ha dhodho an ARLOEDH avel aga Duw.