Read Kernewek Salmow 145 Bible Online

Salmow 145 - Kernewek bible

Salmow 145

¹Kan gormola a Davydh. My a'th ughelha, A Dhuw an Myghtern, ha my a vennik dha hanow bys vykken ha bynnari.

²Pub dydh y'th vennigav, ha gormel dha hanow bys vykken ha bynnari.

³Meur yw an ARLOEDH hag ev a dal bos gormelys yn fras, ha ny yllir hwithra y veuredh.

⁴Unn henedh a wormel dha oberow dhe'n nessa, ha derivas dha wriansow nerthek.

⁵My a breder a splannder gloryus dha veuredh, ha'th oberow marthys.

⁶Ha tus a gews a nerth dha oberow euthyk; my a dheriv dha veuredh.

⁷I a dhiskwa kovadh dha dhader hel, ha kana yn lowen a'th ewnder.

⁸An ARLOEDH yw grassyes ha truedhek, lent ow serri ha meur y dregeredh.

⁹An ARLOEDH yw da orth pub den oll, hag yma y druedh dres oll y oberow.

¹⁰Oll dha oberow a'th wormel, A ARLOEDH, ha'th syns a wra dha venniga.

¹¹I a lever a wolewder dha wlaskor, ha kewsel a'th nerth,

¹²rag may hwrellons dhe vebyon den aswonn y wriansow nerthek, ha golewder meuredh y wlaskor.

¹³Dha wlaskor yw gwlaskor nevra a bes, ha'th vestrynses a dhur a unn henedh dhe'n nessa. An ARLOEDH yw len yn oll y eryow, ha grassyes yn oll y oberow. [27]

¹⁴An ARLOEDH a skoedh oll an re yw koedhys, hag ev a dhrehav oll an re yw plegys dhen dor.

¹⁵Dewlagas pub den a wayt warnas, ha ty a re dhedha aga boes y'n prys gwiw.

¹⁶Ty a iger dha leuv, ha kollenwel hwans pup-tra bew.

¹⁷An ARLOEDH yw gwiryon yn oll y fordhow, ha len yn oll y wriansow.

¹⁸Yma an ARLOEDH ogas dhe bubonan a elow warnodho, dhe bubonan a elow warnodho yn gwiryonedh.

¹⁹Ev a gollenow bodh an re a'n own, hag ev a glew aga kri, hag ev a's selow.

²⁰An ARLOEDH a with pubonan a'n kar; mes oll an debeles a wra ev dhe dhistrui.

²¹Ow ganow a lever gormola an ARLOEDH, ha gwres pub kig benniga y hanow sans bys vykken ha bynnari.