Read Kernewek Salmow 147 Bible Online

Salmow 147 - Kernewek bible

Salmow 147

¹Gormelewgh an ARLOEDH, rag da yw kana gormola dh'agan Duw ni; plegadow ha gwiw yw y wormel.

²An ARLOEDH a dhrehav Yerusalem; ev a guntell war-barth divresow Ysrael.

³Ev a yaghha an re trogh aga holonn, ha kelmi aga goliow.

⁴Ev a amont niver an ster, ev a re henwyn dhe bubonan anedha.

⁵Meur yw agan ARLOEDH, ha meur yw y nerth; heb fin yw y gonvedhes.

⁶An ARLOEDH a skoedh an re hwar, hag a iselha an debeles dhe'n leur.

⁷Kenewgh dhe'n ARLOEDH gans grasyans; kenewgh gormola war an sowtri dh'agan Duw;

⁸Neb a gudh an nevow gans kommol, ha darbari glaw dhe'n nor, ha gul dhe wels tevi war an menydhyow.

⁹Ev a re dhe'n gwarthek aga boes, ha dhe ydhnigow an varghvran pan elwons.

¹⁰Nyns eus ganso delit yn nerth an margh, ha ny gemmer ev plesour yn diwarr gour.

¹¹Mes an ARLOEDH a gemmer plesour y'n re a'n own, y'n re a fydh yn y dregeredh.

¹²Gormel an ARLOEDH, A Yerusalem, gormel dha Dhuw, A Sion.

¹³Rag ev re grevhas barrys dha borthow; ev re vennigas dha fleghes a-bervedh ynnos.

¹⁴Ev a wra kres y'th oryon; ev a'th lenow a waneth a'n gwella.

¹⁵Ev a dhyllo y worhemmynn war an nor; y lavar a res pur uskis.

¹⁶Ev a re ergh avel gwlan; ev a les loesrew avel lusu.

¹⁷Ev a skoell yey avel brewyon; piw a yll sevel a-rag y yeynder?

¹⁸Ev a dhyllo y lavar ha'ga theudhi; ev a wra dh'y wyns hwytha, ha'n dowrow a dhewrak.

¹⁹Ev a dhiskwa y er dhe Yakob, y ordenansow ha'y vreusow dhe Ysrael.

²⁰Ny dhyghtyas nahen kenedhel yndellma, ha'y vreusow, ny's aswonnons. Gormelewgh an ARLOEDH.