Read Kernewek Salmow 148 Bible Online

Salmow 148 - Kernewek bible

Salmow 148

¹Gormelewgh an ARLOEDH. Gormelewgh an ARLOEDH dhiworth an nevow; gormelewgh ev y'n ughelderyow.

²Gormelewgh ev, oll hwi y eledh ev; gormelewgh ev, oll y luyow.

³Gormelewgh ev, howl ha loer; gormelewgh ev, oll hwi ster ow splanna.

⁴Gormelewgh ev, hwi nevow a nevow, ha hwi dhowrow usi a-ugh an nevow.

⁵Gormelens i hanow an ARLOEDH, rag ev a worhemmynnis hag y fons i formys.

⁶Ev re's fastyas bys vykken ha bynnari; ordenans re ros, ha ny vydh terrys.

⁷Gormelewgh an ARLOEDH dhiworth an nor, hwi dhragones ha downderyow oll;

⁸tan ha keser, ergh ha niwlrew; gwyns hag annawel ow kewera y er;

⁹menydhyow ha brennow oll, gwydh leun a frut ha kederwydh oll;

¹⁰miles ha gwarthek oll, kreaturs eus ow slynkya hag ydhyn askellek.

¹¹Myghternedh an nor ha poblow oll, pennsevigyon hag oll breusysi a'n norvys;

¹²gwer yowynk ha maghtethyon, tus hen ha yowynk war-barth.

¹³Gormelens hanow an ARLOEDH, rag unnsel y hanow ev yw ughelhes, hag yma y splannder a-ugh nev ha nor.

¹⁴Ev re dhrehevis korn rag y bobel, gormel rag oll y syns, rag mebyon Ysrael, pobel eus ogas dhodho. Gormelewgh an ARLOEDH.