Read Kernewek Salmow 17 Bible Online

Salmow 17 - Kernewek bible

Salmow 17

¹Pysadow a Davydh. Klew an ewnder, A ARLOEDH, goslow dhe'm garm; ro skovarn dhe'm pysadow mes a dhiwweus heb gil.

²Des ow breus yn-mes a-dhiworthis; re wello dha dhewlagas ewnder.

³Ty re brovas ow holonn; ty re wrug vri ahanav y'n nos; ty re'm assayas ha ny gevsys sherewneth ynnov; ny vydh ow ganow ow pegha.

⁴A-dro dhe oberow den, herwydh geryow dha dhiwweus, my re omwithas rag hynsyow an den garow.

⁵Ow hammow re lenas fast orth dha hynsyow jy; ny drebuchyas ow threys.

⁶My re elwis warnas, rag ty a worthyp dhymm, A Dhuw; pleg dha skovarn dhymm ha klew ow lavarow.

⁷Diskwa marthusyon dha dregeredh, ty neb a selow dre dha leuv dhyghow an re a hwila skovva dhiworth an re a sev er aga fynn.

⁸Gwith vy avel bew an lagas; kudh vy yn-dann skeus dha eskelli,

⁹dhiworth an debeles a'm gwask, ow eskerens fell neb a omsett a-dro dhymm.

¹⁰I a vayl aga holonn gans blonek; gans aga ganow i a gews yn hwoethus.

¹¹I a dheu yn-rag er ow fynn, lemmyn i a omsett a-dro dhymm; ervirys yns i ow thewlel dhe'n leur.

¹²Haval yw dhe lew hwansek dhe skwardya y breydh, ha kepar ha lew yowynk ow skolkya yn-dann gel.

¹³Sav, A ARLOEDH, deus er y bynn, doro e dhe'n dor! Delirv ow enev dhiworth an tebelwas, dre dha gledha;

¹⁴Dhiworth tus, dre dha leuv, A ARLOEDH, dhiworth tus an bys ma. Re gaffons aga rann y'n bewnans ma, ha bedhes aga thorr lenwys a'th kessydhyans kudh. Bedhes aga mebyon lenwys, ha gasens remenant an kessydhyans dh'aga fleghes i.

¹⁵Mes my a hwither war dha fas yn ewnder; lowr vydh ragov, pan dhifunav, gweles dha furv.