Read Kernewek Salmow 18 Bible Online

Salmow 18 - Kernewek bible

Salmow 18

¹Dhe vester an keur. Salm a Davydh, gwas an ARLOEDH, a leveris geryow an gan ma dhe'n ARLOEDH y'n jydh ma'n selwis an ARLOEDH dhiworth leuv y eskerens oll, ha dhiworth Sowl; hag ev a leveris, My a'th kar, A ARLOEDH, ow nerth;

²an ARLOEDH yw ow harrek, ha'm kastell, ha'm delivrer; ow Duw, ow harrek krev may hwilav skovva ynno, ow skoes, ha korn ow selwyans, ow dinas.

³My a elow war an ARLOEDH, neb yw gwiw dhe vos gormelys, ha my a vydh selwys a'm eskerens.

⁴Yth esa kerdyn ankow a-dro dhymm, ha frosow sherewynsi a wrug euth dhymm;

⁵yth esa kerdyn ifarn a-dro dhymm; yth esa antylli ankow a-dheragov.

⁶Y'm anken my a elwis war an ARLOEDH, ha dhe'm Duw y kriis vy rag gweres. Ev a glewas ow lev yn-mes a'n tempel, ha'm kri a-dheragdho a dheuth bys yn y dhiwskovarn.

⁷Ena an nor a grenas ha kryghylli; ha selyow an menydhyow a grysyas ha krena, rag y vos serrys.

⁸Mog a yskynnas mes a'y dhewfrik, ha tan a'y anow, ow tevorya; kolennow a dardhas yn flammow a-dhiworto.

⁹Hag ev a blegyas an nevow, hag a dheuth yn-nans; hag yth esa tewolgow yn-dann y dreys.

¹⁰Hag ev a varghogas war jerub ha nija; ev a nijas uskis war eskelli an gwyns.

¹¹Ev a wrug tewlder y gudhans, y babell a-dro dhodho, kommol tew a dhowr y'n ebron.

¹²Dhiworth an golewder a-ragdho y gommol a dremenas, keser ha kolennow tan.

¹³An ARLOEDH ynwedh a darennas y'n nevow, ha'n Ughella[4] a ros y lev, keser ha kolennow tan.[5]

¹⁴Ev a dhellos y sethow ha skattra y eskerens,[6] lughesennow pals, ha'ga gorra yn deray.

¹⁵Ena yth omdhiskwedhas goverow dowr,[7] ha selyow an norvys a veu diskudhys, orth dha geredh, A ARLOEDH, orth hwyth anall dha dhewfrik.

¹⁶Ev a dhannvonas dhiworth an ughelder ha'm kemmeres, ev a'm tennas mes a dhowrow pals.

¹⁷Ev a'm delivras dhiworth ow eskar galloesek, ha dhiworth an re a'm kas; rag yth ens i re grev ragov.

¹⁸I a dheuth er ow fynn yn dydh ow therroesa; mes an ARLOEDH re beu skoedhyans dhymm.

¹⁹Ev a'm dros yn-mes dhe dyller ledan; ev a'm delivras, drefenn bos dhodho delit ynnov.

²⁰An ARLOEDH re wrug dhymm war-lergh ow ewnder; war-lergh glander ow diwleuv yth attylis ev dhymm.

²¹Rag my re synsis fordhow an ARLOEDH, ha ny dhiberthis yn trog dhiworth ow Duw.

²²Rag yth esa oll y vreusow ev a-dheragov, ha ny dreylys vy y ordenansow dhiworthiv.

²³Hag yth en vy divlam a-dheragdho, ha my a omwithas dhiworth ow hammweyth.

²⁴Rakhenna an ARLOEDH re attylis dhymm herwydh ow ewnder, herwydh glander ow diwleuv yn y wolok ev.

²⁵Gans an den tregeredhus ty a vydh tregeredhus; gans an gour divlam ty a vydh divlam.

²⁶Gans an den glan ty a vydh glan; ha gans an den kamm ty a vydh gorth.

²⁷Rag ty a selow an bobel uvel; mes ty a dhre dhe'n dor an dhewlagas woethus.

²⁸Rag ty a enow ow lugarn; an ARLOEDH ow Duw a wra dhe'm tewlder splanna.

²⁹Rag dredhos my a yll poenya erbynn lu; ha der ow Duw my a yll lemmel dres fos.

³⁰Duw yw divlam y fordh; lavar an ARLOEDH yw prevys; skoes yw dhe seul a hwila skovva ynno.

³¹Rag piw yw Duw marnas an ARLOEDH? Ha piw yw karrek saw agan Duw ni? —

³²an Duw neb a worr grogys a nerth a-dro dhymm, hag ev re wrug ow fordh perfydh.

³³Ev a wra ow threys kepar ha treys ewigow, ha'm settya fyrv war dylleryow ughel.

³⁴Ev a dhysk dhe'm diwleuv gwerrya, ha'm diwvregh a yll plegya gwarak a vrons.

³⁵Ha ty re ros dhymm skoes dha selwyans, dha leuv dhyghow a'm menten, ha'th weres re'm meurhas.

³⁶Ty a ros spas ledan rag ow hammow yn-dannov, ma na drebuchyas ow dewufern.

³⁷My a helgh ow eskerens ha'ga hachya; ha ny dhehwelav bys pan vons distruys.

³⁸My a's brew ma na allons sevel; i a goedh yn-dann ow threys.

³⁹Rag ty re worras grogys a nerth a-dro dhymm rag an gas; ty re worras yn-dannov an re a sevis er ow fynn.

⁴⁰Ty re ros dhymm gwarrow ow eskerens, may hallen vy distrui an re a'm kas.

⁴¹I a grias, mes nyns esa nagonan dh'aga selwel, war an ARLOEDH, mes ny worthybis dhedha.

⁴²My a's brew munys avel doust a-dherag an gwyns; my a's trett yn-dann dreys avel leys an stretys.

⁴³Ty re'm delivras dhiworth strifow an bobel, ha'm gorra yn penn an kenedhlow; pobel na aswonnis vy a wra ow servya.

⁴⁴Kettell glewons ahanav, gostydh yns i dhymm; estrenyon a omblek dhymm.

⁴⁵Estrenyon a gemmer digolonn, i a dheu ow krena yn-mes a'ga heryow.

⁴⁶An ARLOEDH a vew, ha bennigys re bo ow harrek, ha bedhes Duw ow selwyans ughelhes,

⁴⁷an Duw neb a re dhymm dial hag a worr poblow yn-dannov,

⁴⁸neb a'm delirv dhiworth ow eskerens, ha'm drehevel a-ugh an re a sev er ow fynn; ty a'm delirv dhiworth an gour garow.

⁴⁹Rakhenna, my a'th wormel yn mysk an kenedhlow, A ARLOEDH, ha kana gormola dhe'th hanow.

⁵⁰Ev a re selwyans meur dh'y vyghtern, hag a wra tregeredh dh'y Untys, dhe Davydh ha dh'y has bys vykken.