Read Kernewek Salmow 19 Bible Online

Salmow 19 - Kernewek bible

Salmow 19

¹Dhe vester an keur. Salm a Davydh. An nevow a dheriv golewder Duw; ha'n fyrmament a dhiskwa ober y dhiwleuv.

²Dydh a gews orth dydh, ha nos a dhiskwa skentoleth dhe nos.

³Nyns eus kows na geryow; nyns yw aga lev klewys.

⁴Aga lev a yn-mes dhe oll an nor, ha'ga lavarow dhe bennow an norvys. Ynna i y hworras ev tylda a-barth an howl,

⁵a dheu yn-mes avel gour pries dhiworth y jambour, ow lowenhe avel kampyer dhe boenya yn y hyns.

⁶Ev a yn-mes a benn an nevow, hag yma y hyns dhe'n penn arall anedha; ha nyns eus travyth kudhys rag y doemmder.

⁷Lagha an ARLOEDH yw perfydh, ow kul dhe'n enev dasvewa; dustuniow an ARLOEDH yw sur, ow ri furneth dhe'n re sempel.

⁸Arghadowyow an ARLOEDH yw ewn, ow lowenhe an golonn; gorhemmynn an ARLOEDH yw pur, ow ri golow dhe'n dhewlagas.

⁹Own an ARLOEDH yw glan, ow turya bys vykken; breusow an ARLOEDH yw len, ha gwiryon yn tien.

¹⁰Moy desirys yns i ages owr, ages meur a owr fin; ha hwekka yns i es mel, ha'n gribenn mel.

¹¹Dha was ynwedh yw gwarnys gansa; yma gober meur dhe'n re a wra aga synsi

¹²Piw a woer konvedhes y gammweythresow? Glanha vy dhiworth ow feghosow kudh.

¹³Gwith dha was ynwedh rag peghosow bolder; na wrens i maystri warnav! Ena divlam vydhav, ha my a vydh glan a gammweyth meur.

¹⁴Bedhes lavarow ow ganow ha prederow ow holonn plegadow a-ragos, A ARLOEDH ow nerth ha'm dasprenyas.