Read Kernewek Salmow 21 Bible Online

Salmow 21 - Kernewek bible

Salmow 21

¹Dhe vester an keur. Salm a Davydh. An myghtern a lowenha y'th nerth, A ARLOEDH; hag y'th selwyans, assa vydh ev heudhik!

²Ty re ros dhodho hwans y golonn, ha ny neghsys dhodho govynnadow y dhiwweus. Sela.

³Rag ty a a-dheragdho gans bennathow dader; ty a worr kurun a owr fin war y benn.

⁴Ev a wovynnas bewnans orthis, ha ty a'n ros dhodho, dydhyow hir bys vykken ha bynnari.

⁵Meur yw y wolewder ev y'th selwyans; ty a worr splannder ha meuredh warnodho.

⁶Rag ty a ros dhodho bennathow bys vykken; ty a'n gwra heudhik gans lowena a-wel dhe'th fas.

⁷Rag an myghtern a drest y'n ARLOEDH; ha dre dregeredh an Ughella ny wra ev trebuchya.

⁸Dha leuv a gemmer oll dha eskerens; dha leuv dhyghow a gemmer an re a'th kas.

⁹Ty a's gwra kepar ha fornes a dan yn prys dha sorr. An ARLOEDH a's kollenk yn y goler, ha'n tan a's deber.

¹⁰Ty a dhistru aga frut dhiworth an nor, ha'ga has dhiworth mebyon den.

¹¹Rag i a vynnas er dha bynn; i a dewlis dregynn, mes ny allsons y wul.

¹²Rakhenna ty a wra dhedha treylya aga heyn; ty a dharbar kerdyn dha waregow erbynn aga fasow.

¹³Bydh ughelhes, A ARLOEDH, y'th nerth! Ni a gan hag a wormel dha alloes.