Read Kernewek Salmow 24 Bible Online

Salmow 24 - Kernewek bible

Salmow 24

¹Salm a Davydh. Dhe'n ARLOEDH yma an nor ha myns eus ynno, an norvys, ha'n re usi trigys ynno.

²Rag ev re'n selyas war an moryow, ha'y fastya war an dowrow.

³Piw a yskynn yn menydh an ARLOEDH? Ha piw a sev yn y dyller sans?

⁴An den glan y dhiwleuv ha pur y golonn, na dhrehevis y enev dhe euveredh, na lia yn fals.

⁵Ev a dhegemmer bennath dhiworth an ARLOEDH, hag ewnder dhiworth Duw y selwyans ev.

⁶Hemm yw kenedhel an re a'n hwila, neb a hwila fas an Duw a Yakob. Sela.

⁷Drehevewgh agas pennow, hwi borthow, ha bedhewgh drehevys, hwi dharasow heb diwedh, ha'n Myghtern a wolewder a dheu a-bervedh.

⁸Piw yw an Myghtern a wolewder? An ARLOEDH krev ha galloesek, an ARLOEDH galloesek yn kas.

⁹Drehevewgh agas pennow, hwi borthow, ha bedhewgh drehevys, hwi dharasow heb diwedh, ha'n Myghtern a wolewder a dheu a-bervedh.

¹⁰Piw yw an Myghtern a wolewder? ARLOEDH an luyow, ev yw an Myghtern a wolewder. Sela.