Read Kernewek Salmow 30 Bible Online

Salmow 30 - Kernewek bible

Salmow 30

¹Salm a Davydh. Kan dhe sakrans an Tempel. My a'th ughelha, A ARLOEDH, rag ty re'm drehevis, ha ny essys ow eskerens dhe lowenhe a-dro dhymm.

²A ARLOEDH ow Duw, my a grias warnas, ha ty re'm yaghhas.

³A ARLOEDH, ty re dhrehevis ow enev yn-bann dhiworth ifarn, ty re'm bewhas, ma na ylliv yn-nans dhe'n pytt.

⁴Kenewgh gormola dhe'n ARLOEDH, hwi y syns ev, ha grassiwgh dh'y hanow sans.

⁵Rag ny dhur y sorr saw pols byghan; yn y ras yma bewnans. Oelva a dhur dres an nos, mes lowena a dheu y'n myttin.

⁶Ha my, my a leveris y'm siwenyans, ‘Ny drebuchyav vy nevra.’

⁷Y'th tader, A ARLOEDH, ty a wrussa dhymm sevel avel menydh krev; mes ty a gudhas dha fas, ha dyegrys veuv.

⁸Warnas jy, A ARLOEDH, y helwis vy; hag orth an ARLOEDH y hwrugavy govynnadow.

⁹Py gwayn vydh y'm goes pan av yn-nans dhe'n pytt? A vydh an doust orth dha wormel, a vydh ev ow terivas dha wirder?

¹⁰Klew, A ARLOEDH, ha bydh grassyes orthiv; A ARLOEDH, bydh ow gwereser.

¹¹Ty re dreylyas ow hynvann dhe dhons; ty re dhiwiskas ow yskar ha'm grogysa gans lowender.

¹²Rakhenna ow enev a gan gormola ha ny dew. A ARLOEDH ow Duw, my a'th wormel bys vykken.