Read Kernewek Salmow 32 Bible Online

Salmow 32 - Kernewek bible

Salmow 32

¹Salm a Davydh. Maskil. Gwynnvys neb yw gevys y gammweyth, ha neb yw kudhys y beghes.

²Gwynnvys an den na reken an ARLOEDH kammweyth dhodho, ha nag eus falsuri yn y spyrys.

³Pan dewis vy heb aswonn ow feghes, ow eskern a wedhras, ha my owth hanasa oll an jydh.

⁴Rag dydhweyth ha nosweyth poes o dha leuv warnav; ow sugen o treylys kepar hag yn syghor hav. Sela.

⁵My a aswonnis ow feghes dhiso jy, ha ny gudhis ow hammweyth. My a leveris, ‘My a yes ow threuspassow dhe'n ARLOEDH’; ha ty a avas kabel ow feghes. Sela.

⁶Rakhenna y hwra pubonan yw glan pysi warnas jy, yn prys may hyllir dha gavoes, devri yn liv an dowrow meur, ny dhons ogas dhodho.

⁷Ty yw ow hovva, ty a'm gwith rag anken; ty a dheu a-dro dhymm gans kanow livreson. Sela.

⁸My a'th kevarwoedh, ha dyski dhis an fordh mayth yw res dhis mos; ha gans ow lagas warnas my a'th kusul.

⁹Na vedhewgh kepar ha'n margh na'n mul, heb konvedhes, res yw dhedha bos synsys gans genva ha fronn, ma na dheffons ogas dhis.

¹⁰Galarow pals a vydh dhe'n tebelwas, mes neb a drest y'n ARLOEDH, tregeredh a dheu a-dro dhodho.

¹¹Lowenhewgh y'n ARLOEDH, ha bedhewgh heudhik, hwi an re wiryon, germewgh yn lowen, oll hwi yw ewnhynsek agas kolonn.